စတားလုံးက ဖလော်ရီဒါရှိ ဒေါ်လာ ၃၅ သန်းတန် ကမ်းခြေစံအိမ်ကြီးတွင် ရေပြင်အတားအဆီးများ ပြုလုပ်ရန် လျှောက်ထားရာ ဒေသခံတို့ အမျက်ထွက်

ဆီဗက်စတာ စတားလုံးသည် ဖလော်ရီဒါပြည်နယ်၊ Palm Beach ရှိ လူကုံထံများနေထိုင်ရာ ကမ်းခြေ ဒေသတွင် သူ၏ စံအိမ်အနီး ရေပြင်၌ အတားအဆီးများ ပြုလုပ်ရန်အတွက် သက်ဆိုင်ရာ အာဏာပိုင်အဖွဲ့များထံ တင်ပြလျှောက်ထားခဲ့မှုကို အိမ်နီးချင်းများ ဒေါသချောင်းချောင်းထွက်နေသည်။

စတားလုံးက Palm Beach မှ Intracoastal Waterway ရှိ ဒေါ်လာ ၃၅ သန်းတန် စံအိမ်ကြီးအနီး ရေပြင်တွင် ပင်လယ်ရေမှော်များ တားဆီးရန် အတားအဆီးတစ်ခု ပြုလုပ်လိုနေသည်။

ရေမှော်များနှင့် အမှိုက်များ တားဆီးရန် ရေအောက်အတားအဆီးတစ်ခု ပြုလုပ်ရေးအတွက် စတားလုံးက ဖလော်ရီဒါပြည်နယ်၊ သဘာဝ ပတ်ဝန်းကျင်ကာကွယ်ရေးဌာန (FDEP) နှင့် အမေရိကန် စစ်အင်ဂျင်နီယာအဖွဲ့ (USACE) တို့ထံ တင်ပြခဲ့ခြင်း ဖြစ်သည်။

စစ်အင်ဂျင်နီယာအဖွဲ့က စတားလုံး၏ တင်ပြမှုနှင့်စပ်လျဉ်းပြီး ဒေသခံတို့ကို အကြောင်းကြားကာ သဘောထား မှတ်ချက်တောင်းခံသည့် အကြောင်းကြားစာတွင် အဆိုပါစီမံကိန်း၏ အဓိကရည်ရွယ်ချက်မှာ လှေစီးသူတို့ နေအိမ်အနီး မလာစေရန်ဖြစ်ပြီး ရေမှော်မှာ ဒုတိယရည်ရွယ်ချက်သာဖြစ်ကြောင်း ဖော်ပြသည်။

FDEP က စတားလုံး၏ လျှောက်ထားမှုနှင့်စပ်လျဉ်းပြီး ဒေသခံများထံ အကြောင်းကြားစာ ပေးပို့ခဲ့ပြီး ခရစ္စမတ်နေ့ ညနေ ၅ နာရီအထိ သဘောထားမှတ်ချက် တင်ပြနိုင်ကြောင်း ဖော်ပြထားသည်။

စတားလုံး၏ တင်ပြချက်တွင် အစိုးရပိုင် ရေအောက်ပိုင်နက်ကို ငှားရမ်းခွင့်ပြုရန် လျှောက်ထားခြင်းလည်း ပါဝင်သည်။အဘယ်ကြောင့်ဆိုလျှင် ရေအောက်အတားအဆီး ပြုလုပ်ရန်ဟူသည်မှာ ဖလော်ရီဒါပြည်နယ်က ပိုင်သော နိုင်ငံပိုင်ရေပိုင်နက်အတွင်း ပြုလုပ်ရမည်ဖြစ်သောကြောင့် ဖြစ်သည်။

“သူက လှပတဲ့ နေအိမ်တစ်လုံးကို ဝယ်ယူထားပါတယ်။ အဲဒီအိမ်က North End မှာ အလှဆုံးတွေထဲ ပါပါတယ်။ ဒီရေပြင်ကို ဘာကြောင့် ကာကွယ်ချင်လဲဆိုတာ ကျွန်တော်မြင်ပါတယ်။ ဒါပေမယ့် နိုင်ငံပိုင် ရေပိုင်နက်တစ်ခုကို ကိုယ်တစ်ယောက်ထဲ ပိုင်တယ်၊ ဆိုင်တယ် လုပ်လို့ မရဘူးလေ” ဟု အိမ်နီးချင်းဖြစ်သူ Bradford Gary က ပြောသည်။

(Palm Beach မြို့ ၊ North End အရပ်၊ N Lake way အမှတ် ၁၄၈၀ တွင် တည်ရှိသော စတားလုံး၏ ကမ်းခြေစံအိမ်။ ဓာတ်ပုံ-ItSoldFL.com)

ယခုလျှောက်ထားမှုကို Celebrity wealth manager တစ်ဦးဖြစ်သူ Lester Knispel က Southpaw Trust ၏ ကိုယ်စားတင်ပြခဲ့ခြင်းဖြစ်သည်။

(မှတ်ချက်။ Southpaw Trust သည် စတားလုံး၏ နေအိမ်ဝယ်ယူရန်သက်သက်အတွက် တည်ထောင်ထား ခြင်းဖြစ်သည်။ Trustee မှာ Lester J. Knispel ဖြစ်သည်။Southpaw ဟူသော အမည်မှာ စတားလုံးက ဘယ်သန်ဖြစ်ခြင်းကို ရည်ညွှန်းထားခြင်းလည်း ဖြစ်သည်)

အိမ်ခြံမြေမှတ်တမ်းများအရ စတားလုံးက အဆိုပါစံအိမ်ကို ၂၀၂၀ ပြည့်နှစ်၊ ဒီဇင်ဘာလအတွင်း ဝယ်ယူခဲ့ရာ တွင် ကန်ဒေါ်လာ ၃၅ ဒသမ ၃၇၅ သန်း ပေးခဲ့ရသည်ဟု ဆိုသည်။ နှစ်ထပ်အိမ်ဖြစ်ကာ ခြံဝန်းအတွင်း ဧည့်ဂေဟာအိမ်တစ်လုံးလည်း ပါဝင်ပြီး ကမ်းခြေအလျား ၂၆၂ ပေ ပိုင်ဆိုင်ထားသည်။

ပြည်နယ်မှတ်တမ်းများအရ စတားလုံးတင်ပြသည့် အတားအဆီးမှာ ရေပေါ်တွင် ၈ လက်မခန့် ပေါ်နေမည် ဖြစ်ပြီး ရေအောက်တွင် ၁၀ လက်မခန့် နစ်မြုပ်နေမည်ဖြစ်သည်ဟု ဆိုသည်။

ထိုအတားအဆီးများကို နိုင်လွန်ကြိုးဖြင့် ရေအောက်ကြမ်းပြင်သို့ ဆက်သွယ်ကာ ထိန်းချုပ်ထားမည်ဖြစ်သည်။

ရေသတ္တဝါတို့သည် အတားအဆီး၏ အောက်ဘက် ရေအောက်တွင် လွတ်လပ်စွာ သွားလာနိုင်မည်ဖြစ်ကြောင်း စီမံကိန်းအကောင်အထည်ဖော်ပေးမည့် အင်ဂျင်နီယာက ဖလော်ရီဒါ သဘာဝပတ်ဝန်းကျင် ကာကွယ်ရေးဌာန သို့ တင်ပြသော အီးမေးလ်တွင် ဖော်ပြသည်။

(စတားလုံးနှင့် ဇနီးဖြစ်သူ ဂျနီဖာ ဖလာဗင်တို့ကို ၂၀၂၂ ခုနှစ်အတွင်း Palm Beach တွင် တွေ့ခဲ့ရပုံ။ ဓာတ်ပုံ- CAPEHART)

ယခုစီမံကိန်းကို ၂၀၂၂ ခုနှစ်ခန့်ကတည်းက စတင်လျှောက်ထားခဲ့ခြင်းဖြစ်ပြီး ဖလော်ရီဒါ သဘာဝပတ်ဝန်းကျင် ကာကွယ်ရေးအဖွဲ့က ကွင်းဆင်းစစ်ဆေးခဲ့ပြီးဖြစ်ကြောင်း မှတ်တမ်းများတွင် ဖော်ပြသည်။

၂၀၂၃ ခုနှစ်၊ ဇန်နဝါရီလ ၂၃ ရက်တွင် စတားလုံး၏ ကိုယ်စားလှယ်အဖွဲ့က ပြည်နယ်အစိုးရထံ တရားဝင် လျှောက်ထားမှု စတင်ခဲ့သည်။

စစ်အင်ဂျင်နီယာအဖွဲ့သို့ တင်ပြမှုမှာ ယခုနှစ် သြဂုတ်လ ၁၆ ရက်တွင်ဖြစ်ကြောင်း Army Corps ၏ ပြောရေးဆိုခွင့်ရ ပုဂ္ဂိုလ်က ပြောသည်။

Army Corps က စတားလုံး၏ လျှောက်ထားမှုအပေါ် အများပြည်သူတို့ အကြံပြုရန် သဘောထားတောင်းခံမှုကို အောက်တိုဘာ ၂၄ ရက်က စတင်လက်ခံခဲ့ပြီး နိုဝင်ဘာ ၂၄ ရက်တွင် ပိတ်သိမ်းခဲ့သည်။

အဆိုပါ သတိပေးစာကို Army Corps ၏ ဝက်ဘ်ဆိုက်တွင် တရားဝင်ဖော်ပြထားပြီး စတားလုံး၏ နေအိမ် တဖက်တချက်စီရှိ အိမ်နီးချင်း ၂ ဦးထံသို့မူ တိုက်ရိုက်ပေးစာပေးပို့ထားကြောင်း Army Corps ၏ ပြောရေးဆိုခွင့်ရပုဂ္ဂိုလ်က ပြောသည်။

အိမ်နီးချင်းတစ်ဦးဖြစ်သော Susan Gary နှင့် ခင်ပွန်းဖြစ်သူ Bradford တို့ကမူ စတားလုံး၏ စီမံကိန်းကို ကန့်ကွက်ကြောင်း လွှတ်တော်အမတ် Lois Frankel ထံ စာပေးပို့ထားသည့်အပြင် ပြည်နယ်အစိုးရထံလည်း ကန့်ကွက်စာ ပေးပို့ထားသည်။

စာရေးသား အကြံပြုမှုများကို သဘာဝပတ်ဝန်းကျင်ကာကွယ်ရေးအဖွဲ့ထံ ဒီဇင်ဘာလ ၂၅ ရက် ညနေ ၅ နာရီ မတိုင်မီ နောက်ဆုံးပေးပို့နိုင်ကြောင်း ဖိတ်ခေါ်ထားသည်။

(စတားလုံး၏ စံအိမ်နောက်ဘက်မြင်ကွင်းကို ၂၀၂၄ ခုနှစ်၊ ဒီဇင်ဘာလ ၁၂ ရက်က ရိုက်ကူးထားသည့် ဓာတ်ပုံ ဖြစ်သည်။ ဓာတ်ပုံ-Damon Higgins/ Palm Beach Daily News)

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Neighbors question Sylvester Stallone's request for seaweed barrier near Palm Beach home (palmbeachpost)

Photo Credit- Damon Higgins/ Palm Beach Daily News, CAPEHART, ItSoldFL