ဆစ်ဒနီဆိပ်ကမ်းတွင် ပင်လယ်ရေမှာ သွေးနီရောင်သို့ ဆန်းကြယ်စွာ ပြောင်းလဲသွားရာ သြစတေးလျ နိုင်ငံသားများ ထိတ်လန့် တုန်လှုပ်နေကြ

ဆစ်ဒနီဆိပ်ကမ်းတွင် ပင်လယ်ရေတို့မှာ ရဲရဲနီသော သွေးနီရောင်သို့ ဆန်းကြယ်စွာ ပြောင်းလဲသွားရာ သည်းထိတ်ရင်ဖို ရုပ်ရှင်ဇာတ်လမ်းတစ်ခုသဖွယ်ဖြစ်နေပြီး သြစတေးလျနိုင်ငံသားများ ထိတ်လန့်တုန်လှုပ် လျက်ရှိသည်။

ဆစ်ဒနီမြို့၊ Kirribillli အရပ်ရှိ Milson Park ပန်းခြံဝန်းကျင်သည် ချမ်းသာကြွယ်ဝသူတို့နေထိုင်ရာနေရာဖြစ်ပြီး ထိုဒေသခံတို့က ဆစ်ဒနီဆိပ်ကမ်းရှိ ရေများ ရဲရဲနီ ပြောင်းလဲမှုကို စတင်သတိပြုမိခဲ့ကြခြင်း ဖြစ်သည်။

အဘယ်ကြောင့် ထိုသို့ ရေများရဲရဲနီအရောင်ပြောင်းလဲသွားသည်ကို ဒေသခံများ နားမလည်နိုင်ဖြစ်နေကြသည်။

ဒေသအုပ်ချုပ်ရေးကောင်စီက စုံစမ်းစစ်ဆေးရန်အတွက် အရာရှိများ စေလွှတ်ထားသည်။

သို့သော် လေ့လာစစ်ဆေးသော အရာရှိတို့သည်လည်း ဆန်းကြယ်စွာ အရောင်ပြောင်းသွားခြင်း၏ အကြောင်းရင်းကို မဖော်ထုတ်နိုင်ကြချေ။

မှန်းဆချက်တစ်ခုသာ ထွက်ပေါ်လာသည်။

(ဆန်းကြယ်သည့် ပြောင်းလဲမှုကို ဒီဇင်ဘာ ၂ ရက်နေ့ မွန်းလွဲပိုင်းတွင် စတင်သတိပြုမိခဲ့ကြသည်။ ဓာတ်ပုံ-7 News)

ထူးဆန်းသော ရေအရောင်ပြောင်းမှုမှာ လူသတ်မှုတစ်ခုခုကြောင့် မဟုတ်ဘဲ ပိုက်လိုင်းချွတ်ယွင်းမှုတစ်ခုကြောင့် ဖြစ်နိုင်ကြောင်း အရာရှိတို့က သံသယရှိကြသည်။

ရေပိုက်လိုင်းသမားတို့ အသုံးပြုသော Fluorescein ဟုခေါ်သည့် အရောင်ဆိုးဆေးကြောင့် ရေများ အရောင်ပြောင်းလဲခြင်းဖြစ်နိုင်သည်ဟု အရာရှိတို့က ယူဆကြသည်။

North Sydney ကောင်စီက North South Wales Protection Authority (NSWPA) အဖွဲ့ကို ယခုကိစ္စလွှဲအပ်ထားပြီး ပြဿနာရင်းမြစ်ကို စုံစမ်းစစ်ဆေးလျက်ရှိသည်။

NSWPA ၏ ထုတ်ပြန်ချက်တွင် ဖော်ပြသည်မှာ “ရေအရောင်ပြောင်းတာဟာ Kirribilli မှာရှိတဲ့ ရေပြွန်က ပိုက်လိုင်းဆိုးဆေးကြောင့် ဖြစ်နိုင်ချေရှိတယ်လို့ North Sydney ကောင်စီက အသိပေးလာပါတယ်။ ကျွန်တော်တို့အနေနဲ့ ဖြစ်နိုင်ချေရှိတဲ့ အကြောင်းရင်းကို စုံစမ်းစစ်ဆေးနေပါတယ်” ဟု ဖော်ပြသည်။

“Fluorescein ဟာ အဆိပ်သင့်နိုင်မှု နည်းပါးပါတယ်။ ဒါပေမယ့် ပမာဏနည်းနည်းလေးနဲ့ အများကြီး ပျံ့နှံ့နိုင်တာကြောင့် အသုံးပြုရာမှာ နည်းနည်းသာ သုံးသင့်ပါတယ်”

သြစတေးလျတွင် ယခင်က ပိုက်လိုင်းသမားတို့ကြောင့် ယခုကဲ့သို့ ဖြစ်ရပ်မျိုး ဖြစ်ပွားခဲ့ဖူးသည်။

ပြီးခဲ့သော လအနည်းငယ်ကလည်း North Sydney အရပ်တွင်ပင် နေအိမ်များအနီးရှိ ရေတို့မှာ အစိမ်းရောင် တောက်တောက် အရောင်များသို့ ပြောင်းလဲသွားခဲ့ဖူးသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Aussies fear the worst after waters in Sydney turn a mysterious deep red (metro) Photo Credit-7News