လူတို့ သေဆုံးခွင့်မရှိကြောင်း ပိတ်ပင်တားမြစ်ထားသော ပြင်သစ်နိုင်ငံမှ မြို့ ၃ မြို့အကြောင်း၊ တားမြစ်ချက်ကို မလိုက်နာပါက ပြင်းထန်စွာ အရေးယူမည်ဟု ထုတ်ပြန်ထား

ဥပဒေတားမြစ်ချက်များတွင် သေဆုံးခြင်း ပါဝင်လိမ့်မည်ဟု သင်မှတ်ထင်ထားမည် မဟုတ်ချေ။

ပြင်သစ်နိုင်ငံမှ မြို့ ၃ မြို့တွင်မူ လူတို့ သေဆုံးခွင့်မရှိကြောင်း ပိတ်ပင်တားမြစ်ထားသည်။

ပြင်သစ် အနောက်တောင်ပိုင်းမှ ချုညို (Cugnaux) ၊ ဆားပိုးနက်စ် (Sarpournex) ၊ အရှေ့တောင်ပိုင်းမှ လေ လဗွန်ဒု (Le Lavandou) မြို့များတွင် လူသေဆုံးခွင့်မရှိကြောင်း ဥပဒေဖြင့် တားမြစ်ထားသည်။

လေ လဗွန်ဒုသည် လူသေဆုံးခွင့် ပထမဆုံး ပိတ်ပင်ခဲ့သောမြို့ဖြစ်သည်။ ၂၀၀၀ ပြည့်နှစ်တွင် လေ လဗွန်ဒု မြို့တော်ဝန်က မြို့အတွင်း လူသေဆုံးမှုများကို စတင်ပိတ်ပင်ခဲ့ခြင်းဖြစ်သည်။

ပိတ်ပင်ရခြင်း၏ အကြောင်းရင်းမှာ သင်္ချိုင်းမြေနေရာ မရှိတော့သောကြောင့် ဖြစ်၏။

သင်္ချိုင်းနေရာသစ်ဖွင့်လှစ်ရန် လျှောက်ထားတင်ပြသော်လည်း ခွင့်ပြုချက်မရသောကြောင့် လူသေဆုံးမှုများ ပိတ်ပင်ရန်မှတပါး အခြားရွေးချယ်စရာ မရှိခဲ့ချေ။

မြို့တော်ဝန် ဂျီး ဘာနာဒီ (Gil Bernardi) က အဆိုပါ ဥပဒေထုတ်ပြန်ချိန်တွင် ပြောကြားခဲ့သည်မှာ ဤဥပဒေမှာ ရူးနှမ်းနှမ်းနိုင်လှကြောင်း ပြောသည်။

“ကိုးရိုးကားယားအခြေအနေမျိုးကြောင့် ရူးကြောင်ကြောင် ဥပဒေထုတ်ပြန်ခဲ့ရတာ ဖြစ်ပါတယ်” ဟု ဘာနာဒီက ပြောသည်။

နောင် ၇ နှစ်အကြာတွင် ချုညို မြို့တော်ဝန်ကလည်း အလားတူ ပိတ်ပင်မှုမျိုး ပြုလုပ်ခဲ့ရသည်။

ချုညိုမြို့တွင်လည်း သင်္ချိုင်းသစ်ဖွင့်လှစ်ရန် ခွင့်ပြုချက် မရသောကြောင့် ဖြစ်သည်။

ချုညိုမြို့တွင် လူသေဆုံးမှု ပိတ်ပင်ချက်မှာ အလုပ်ဖြစ်ခဲ့သည်။

ပြင်သစ်အာဏာပိုင်တို့က ချုညိုတွင် သင်္ချိုင်းသစ်ဖွင့်ရန် ခွင့်ပြုပေးခဲ့သည်။

ဆားပိုးနက်စ်မြို့တွင်လည်း အလားတူအခြေအနေမျိုးကြောင့် လူသေဆုံးမှု တားမြစ်ပိတ်ပင်ခဲ့သည်။

သို့သော် ဆားပိုးနက်စ်မြို့တွင်မူ ပိုမိုတင်းကြပ်ထားသည်။

တားမြစ်ချက်ကို ဖောက်ဖျက်ကာ လူသေဆုံးပါက အရေးယူမည်ဟု အမိန့်ထုတ်ထားသည်။

ဆားပိုးနက်စ်တွင် သင်္ချိုင်းသစ်ဖွင့်ရန်အတွက် ပုဂ္ဂလိကပိုင်မြေနေရာတစ်ခုကို ဝယ်ယူပြီး ဖွင့်လှစ်ရန် စီစဉ်ခဲ့သော်လည်း ပြင်သစ်အာဏာပိုင်တို့က ခွင့်မပြုသောကြောင့် ၂၀၀၈ ခုနှစ်တွင် ဆားပိုးနက်စ် မြို့တော်ဝန်က လူသေဆုံးမှုများ ပိတ်ပင်ခဲ့ခြင်း ဖြစ်သည်။

(လေ လဗွန်ဒုသည် လူသေဆုံးမှုများ တားမြစ်ပိတ်ပင်သည့် ပထမဆုံးမြို့ဖြစ်သည်။ ဓာတ်ပုံ-Getty)

ဆားပိုးနက်စ်တွင် တားမြစ်ချက်ကို ချိုးဖောက်ကာ သေဆုံးလျှင် အရေးယူမည်ဟု မြို့တော်ဝန်က အမိန့်ထုတ်ခဲ့သည်။

မြို့တော်ဝန်ရုံး အမိန့်ထုတ်ပြန်စာတွင် မြို့တော်ဝန် Gerard Lalanne က ကြေညာထားသည်မှာ “ဆားပိုးနက်စ်တွင် သင်္ချိုင်းမြေနေရာမရှိဘဲ သေဆုံးမှုများကို တားမြစ်ပိတ်ပင်သည်။ ချိုးဖောက်သူများအား ပြင်းထန်စွာ အရေးယူမည်” ဟု ကြေညာထားသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: The three French cities where it's 'illegal to die' for a very practical reason (express) Photo Credit-Getty