ထရမ့်ရွေးကောက်ပွဲနိုင်လျှင် အမေရိကကို ကျောခိုင်းမည်ဟု ပြောဆိုထားသော အမေရိကန်နိုင်ငံသားများကို အီတလီရှိ ကျွန်းတစ်ကျွန်းက နေအိမ်များကို ဈေးသက်သာစွာ ရောင်းချပေးမည်ဖြစ်ကြောင်းပြောကာ လာရောက်နေထိုင်ရန် ဖိတ်ခေါ်

ဒေါ်နယ်ထရမ့်သည် အမေရိကန်သမ္မတသစ်အဖြစ် ရွေးကောက်ပွဲအနိုင်ရရှိသွားသည်။

အိမ်ဖြူတော်သို့ ဒုတိယအကြိမ် ပြန်လည်ရောက်ရှိလာမှုအပေါ် တုံ့ပြန်ပုံအမျိုးမျိုးရှိနေသည်။

ထရမ့် ရွေးကောက်ပွဲနိုင်လျှင် အမေရိကကို ကျောခိုင်းမည်ဟု ပြောဆိုထားသော အကျော်အမော်များနှင့် အခြားပြည်သူများစွာရှိနေသည်။

ထရမ့်၏ လက်ထက်တွင် အနာဂတ်ကောင်း တွေ့ရမည်မဟုတ်ကြောင်း ၎င်းတို့က ပြောကြသည်။

ထိုသူတို့ကို အီတလီရှိ Sardina ကျွန်းက လာရောက်နေထိုင်ရန် ဖိတ်ခေါ်လျက်ရှိနေသည်။

Sardina ကျွန်းပေါ်ရှိ Ollolai ဒေသသည် စီးပွားရေးကျဆင်းမှုနှင့်အတူ လူဦးရေကျဆင်းလာနေသော ဒေသဖြစ်သည်။

ဒေသအုပ်ချုပ်ရေးအဖွဲ့က ၎င်းတို့၏ဒေသသို့ လူအများရွှေ့ပြောင်းနေထိုင်ကြရန် ဖိတ်ခေါ်နေပြီး နေအိမ်များကို ၁ ယူရိုမျှဖြင့် ရောင်းချပေးနေသည်။

ထရမ့်ရွေးကောက်ပွဲအနိုင်ရမှုအပေါ် စိတ်ပျက်လက်ပျက်ဖြစ်နေသည့် အမေရိကန်များစွာရှိနေသည်ကို တွေ့လာရချိန်တွင် Ollolai ဒေသအုပ်ချုပ်ရေးအဖွဲ့က အဆိုပါအမေရိကန်နိုင်ငံသားတို့အတွက် ရည်ရွယ်ကာ ဝက်ဘ်ဆိုက်တစ်ခု လွှင့်တင်လာသည်။

အမေရိကကို ကျောခိုင်းလိုနေသော အမေရိကန်နိုင်ငံသားများကို နေအိမ်များ ဈေးသက်သာစွာဖြင့် ကမ်းလှမ်းပေးလာနေပြီး နေအိမ်များ လျင်မြန်စွာ ရောင်းထွက်မည်ဟု Sardina ကျွန်း အုပ်ချုပ်ရေးအဖွဲ့က မျှော်လင့်ထားသည်။

“ကမ္ဘာ့နိုင်ငံရေးအခြေအနေများကို စိတ်ပျက်နေပါသလား။ အခွင့်အလမ်းသစ်များ ဖမ်းဆုပ်ရင်း မျှခြေညီသည့် ဘဝနေထိုင်မှုဟန်ကို ရှာဖွေနေပါသလား။

Sardinia ကျွန်း၏ အံ့မခန်း နိဗ္ဗာန်ဘုံရှိရာ ဥရောပသို့ အဆိုပါ အခြေအနေများမှ ကျောခိုင်းလွတ်မြောက်ခိုလှုံရန် အချိန်ကျရောက်ပါပြီ” ဟု အဆိုပါဝက်ဘ်ဆိုက်တွင် ဖော်ပြသည်။

ယခုကမ်းလှမ်းချက်မှာ အမေရိကန်သမ္မတရွေးကောက်ပွဲ ရလဒ်များ ထွက်ပေါ်ပြီးနောက်ပိုင်းတွင် စီစဉ်ခြင်း ဟုတ်၊မဟုတ် ဖော်ပြထားခြင်းမရှိသော်လည်း မြို့တော်ဝန် Francesco Columbu က CNN သတင်းဌာနသို့ ပြောသည်မှာ အမေရိကန် မဲဆန္ဒရှင်များကို ဆွဲဆောင်ရန် ရည်ရွယ်ကာ ဝက်ဘ်ဆိုက်လွှင့်တင်ခဲ့ခြင်းဖြစ်ကြောင်း ပြောသည်။

Sardinia ကျွန်း ပြန်လည်အသက်ဝင်လာစေရန် အမေရိကန်တို့က ကူညီလိမ့်မည်ဟု မျှော်လင့်ထားကြောင်း ၎င်းက ပြောသည်။

((အမေရိကန်နိုင်ငံသားများကို ပိုမိုဦးစားပေးမည်))

မြို့တော်ဝန်က ပြောသည်မှာ အခြားနိုင်ငံသားများကိုလည်း ကြိုဆိုကြောင်း၊ သို့သော် အမေရိကန်နိုင်ငံသားများအတွက်ဆိုလျှင် ပိုမိုမြန်ဆန်စွာ ရရှိနိုင်မည်ဖြစ်ကြောင်း ပြောသည်။

“တခြားနိုင်ငံသားတွေ လျှောက်ထားမယ်ဆိုရင်လည်း ကျွန်တော်တို့ ပိတ်ပင်ထားတာ မရှိပါဘူး။ ဒါပေမယ့် အမေရိကန်နိုင်ငံသားတွေကတော့ လျှောက်ထားရပိုမိုမြန်ဆန်မှာ ဖြစ်ပါတယ်။ ဒီဒေသပြန်လည် ရှင်သန်လာဖို့အတွက် အမေရိကန်နိုင်ငံသားတွေကို အားထားထားပါတယ်။ သူတို့က ကျွန်တော်တို့ရဲ့ အနိုင်ဖဲတွေပါ”

“မကြာသေးမီက ရွေးကောက်ပွဲအနိုင်ရသွားတဲ့ အမေရိကန်သမ္မတကို ကျွန်တော်တို့ အမည်နာမ ထုတ်ဖော် ပြောကြားလိုခြင်းတော့ မရှိပါဘူး။ ဒါပေမယ့် ကျွန်တော်တို့အားလုံးသိနေတဲ့အတိုင်း အမေရိကန်နိုင်ငံသား များစွာဟာ သူ့ကြောင့် နိုင်ငံကို စွန့်ခွာကျောခိုင်းလိုစိတ် ပေါ်ပေါက်နေကြပါတယ်” ဟု မြို့တော်ဝန် Columbo က ဖြည့်စွက်ပြောကြားသည်။

Sadinia ကျွန်းတွင် အခြေချနေထိုင်လိုသူတို့အတွက် နေအိမ်အမျိုးအစား ၃ မျိုး စီစဉ်ထားရှိသည်။

ပထမတစ်မျိုးမှာ Digital nomads တို့အတွက် ယာယီအခမဲ့နေထိုင်ခွင့်ပေးမည့်အိမ်များ၊ ဒုတိယတစ်မျိုးမှာ ယိုယွင်းပျက်စီးနေသောအိမ်များဖြစ်ပြီး ၁ ယူရိုဖြင့် ရောင်းချပေးမည် ဖြစ်သည်။

တတိယတစ်မျိုးမှာမူ အသင့်တက်နေနိုင်သည့် အိမ်များဖြစ်ကာ ဈေးနှုန်းမှာ ယူရို ၁၀၀,၀၀၀ (ကန်ဒေါ်လာ ၁၀၅,၀၀၀) အထိ ရှိသည်။

Ollolai တွင် လက်ရှိအားဖြင့် လူဦးရေ ၁၁၅၀ ခန့်သာ နေထိုင်သည်။

ပြီးခဲ့သော ရာစုနှစ်အတွင်း လူဦးရေ ၂၂၅၀ မှ ၁၃၀၀ ဦးအထိ ကျဆင်းသွားခဲ့ခြင်း ဖြစ်သည်။

စီးပွားရေးအခြေအနေများကြောင့် ကျွန်းနေပြည်သူများ စွန့်ခွာကျောခိုင်း ထွက်ခွာသွားကြခြင်းလည်း ဖြစ်သည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767  သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Americans 'unhappy' with Trump's win can buy dirt-cheap homes on this tiny Italian island (wionews)