အမေရိကန်တွင် ၁၉၉၁ ခုနှစ်က ဝယ်ထားခဲ့သော မြေကွက်သို့ သွားရောက်ကြည့်ရှုသော ဆရာဝန်မှာ သူ၏ မြေကွက်တွင် ဒေါ်လာ ၁ ဒသမ ၅ သန်းတန် အိမ်တစ်လုံး ရှိနေသည်ကို တွေ့ရ

[Unicode]

မိမိ အမြဲအခြေချ နေထိုင်မည့် နေအိမ်ဆောက်လုပ်ရန် မြေကွက်ဝယ်ထားပြီးနောက် နောင်တစ်ချိန်တွင် ထိုမြေကွက်သို့ သွားရောက်ကြည့်ရှုရာ အခြားသူက အိမ်တစ်လုံးဆောက်ထားသည့်အဖြစ်မျိုး ကြုံဖူးပါသလား။

အမေရိကန်ပြည်ထောင်စုတွင် မြေကွက်လွတ်တစ်ခု ဝယ်ယူထားခဲ့သော ဒေါက်တာ ဒဲနီယယ် ကဲနစ္စဘာ့ဂ် (Daniel Kenigsberg) မှာ ထိုအဖြစ်မျိုး ရင်ဆိုင်ခဲ့ရသည်။

ဒေါက်တာ ကဲနစ္စဘာ့ဂ်သည် ဟော်မုန်းဆိုင်ရာပညာရပ်ကို အထူးပြုသည့် ဆရာဝန်တစ်ဦး ဖြစ်သည်။

ဒေါက်တာ ကဲနစ္စဘာ့ဂ်က သူ၏ မြေကွက်တွင် နေအိမ် လာရောက်ဆောက်လုပ်သူကို တရားရုံးတွင် တိုင်တန်းခဲ့သည်။

သူ၏ ကလေးဘဝနေအိမ်ဘေးတွင် အမြဲအခြေချရန် အိမ်တစ်လုံး ဆောက်လုပ်မည်ဟု ရည်ရွယ်ကာ ထိုမြေကွက်ကို ဝယ်ယူခြင်း ဖြစ်သည်။

ကွန်နက်တီကပ်ပြည်နယ် New Haven မြို့၊ Sky Top Terrace လမ်း၊ အမှတ် ၅၁ တွင် တည်ရှိပြီး ဧကဝက် ကျယ်ဝန်းသည်။

ဒေါက်တာ ကဲနစ္စဘာ့ဂ်က ၁၉၉၁ ခုနှစ်တွင် ဝယ်ယူခဲ့ခြင်း ဖြစ်သည်။

၎င်း၏ ဖခင်က အဆိုပါ ခြံကွက်အနီးရှိ အိမ်ကို ၁၉၅၃ ခုနှစ်တွင် ဒေါ်လာ ၅၀၀၀ မျှဖြင့် ဝယ်ယူခဲ့သည်။

ထို့ကြောင့် ထိုနေရာမှာ သူ့အတွက် မြတ်နိုးမှုတန်ဖိုးတစ်ခု ရှိနေသည်။

၎င်းတို့ မိသားစုက ထိုမြေကွက်ကို Eleazar Parmly Jr ထံမှ ဝယ်ယူခဲ့ခြင်း ဖြစ်သည်။

ထိုမိသားစုသည် ဤဒေသတွင် ၁၇၁၆ ခုနှစ်ကတည်းက မျိုးရိုးစဉ်ဆက် နေထိုင်ခဲ့ခြင်း ဖြစ်သည်။

ဒေါက်တာ ကဲနစ္စဘာ့ဂ်သည် နယူးယောက်တွင် ဆေးတက္ကသိုလ် တက်ရောက်ခဲ့ပြီးနောက်ပိုင်း Long Island တွင် မိသားစုနှင့်အတူ နေထိုင်ခဲ့ကြောင်း Greenwichtime သတင်းဌာနက ဖော်ပြသည်။

ဒေါက်တာ ကဲနစ္စဘာ့ဂ်က ၎င်းဝယ်ယူထားသော မြေကွက်ကို နှစ်ပေါင်းများစွာ အိမ်မဆောက်ဘဲ မြေကွက် အလွတ်အဖြစ်သာ ထားခဲ့သော်လည်း တနေ့တွင် ထိုဒေသသို့ ပြောင်းရွှေ့အခြေချ နေထိုင်မည်ဟူသော အိပ်မက်က အမြဲရှိနေသည်။

“ကျွန်တော့်သားသမီး တစ်ဦးဦးက ကွန်နက်တီကပ်ပြည်နယ်မှာ နေချင်တယ်ဆိုရင် ကျွန်တော့် အနေနဲ့ အလွန်ဝမ်းမြောက်ရမှာ ဖြစ်ပါတယ်”ဟု ကဲနစ္စဘာ့ဂ်က ပြောသည်။

သို့သော် တစ်ရက်တွင် ထိုအိပ်မက်များ ပျယ်လွင့်သွားစေမည့် ဖုန်းခေါ်ဆိုမှုတစ်ခု သူ့ထံ ဝင်လာသည်။

(ဒေါက်တာ ဒယ်နီယယ် ကဲနစ္စဘာ့ဂ် )

သူငယ်ချင်းတစ်ဦးက ဆက်သွယ်လာသောဖုန်းဖြစ်ပြီး သူ၏ မြေကွက်ပေါ်တွင် ဒေါ်လာ ၁ ဒသမ ၅ သန်းတန် အိမ်တစ်လုံးရောက်နေကြောင်း အသိပေးလာခြင်း ဖြစ်သည်။

ထိုစဉ်က ဖုန်းပြောခဲ့သည့်အကြောင်း ကဲနစ္စဘာ့ဂ်က CT Insider သတင်းဌာနသို့ “ကျွန်တော် သူ့ကို ပြောခဲ့တာ က အဲဒီမြေကွက်ကို ငါပိုင်တယ်။ ဘယ်တုန်းကမှ ပြန်မရောင်းထားဘူး”ဟု ပြောခဲ့ပြီး အလွန်တုန်လှုပ်သွားခဲ့မိ ကြောင်းလည်း ၎င်းက ပြောသည်။

ထို့နောက် အဆိုပါ မြေနေရာသို့ သွားရောက်ကြည့်ရှုရာ အပြီးသတ်လုနီးပါးဖြစ်နေသည့် အိပ်ခန်း ၄ ခန်းပါ အိမ် ၁ လုံးကိုတွေ့ရပြီး အိမ်တန်ကြေးမှာ ဒေါ်လာ ၁ ဒသမ ၄၅ သန်းခန့်ရှိသည်ဟု ခန့်မှန်းရသည်။

အဆိုပါအိမ်မှာ အရောင်းဈေးကွက်တင် ရောင်းချထားပြီး အိမ်ခြံမြေမှတ်တမ်းများအရ ၂၀၂၂ ခုနှစ်၊ အောက်တိုဘာလတွင် 51 Sky Top Partners LLC ထံ ကန်ဒေါ်လာ ၃၅၀,၀၀၀ ဖြင့် ရောင်းချခဲ့သည်ကို တွေ့ရသည်။

ကဲနစ္စဘာ့ဂ်က ပြောသည်မှာ ထိုအရောင်းအဝယ်နှင့် ပတ်သက်ပြီး လုံးဝ မသိခဲ့ရကြောင်း ပြောသည်။

ကဲနစ္စဘာ့ဂ်က အဆိုပါ ကုမ္ပဏီကို အမှု ၉ ခုဖြင့် တရားစွဲထားသည်။

အဆိုပါ အမှုများတွင် ကျူးကျော်မှု ၊ တရားမဝင် ခိုးယူမှုနှင့် မသမာသော ရောင်းဝယ်မှုများ ပါဝင်ပြီး နစ်နာကြေး ဒေါ်လာ ၂ သန်း ရလိုမှုလည်း ပါဝင်သည်။

ယခုကဲ့သို့ တရားစွဲဆိုမှုဖြင့် မြေအရောင်းအဝယ်ကို ပယ်ဖျက်နိုင်မည်ဟု ကဲနစ္စဘာ့ဂ်က မျှော်လင့်ထားသည်။

ကဲနစ္စဘာ့ဂ်က အဆိုပါ ကုမ္ပဏီအား မြေပေါ်ရှိ အဆောက်အအုံ (သို့မဟုတ်) ပစ္စည်းများအားလုံးကို ဖယ်ရှားပေးရန် တောင်းဆိုထားသည်။

သတင်းများအရ ထိုကုမ္ပဏီမှာလည်း မြေနေရာကို အလိမ်ခံရကာ ဝယ်ယူခဲ့ရခြင်းဖြစ်ကြောင်း သိရသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767  သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Man returns to land he bought in 1991 for home to find a $1.5m house already on it (supercarblondie)

Photo Credit: -pixabay, RMA Long Island IVF