ပြည်ပ အိမ်ခြံမြေ သတင်း | Posted by စည်သူအောင်
[Unicode]
အကယ်၍ သင်သာ နှစ်ပေါင်း ၁၀၀၀၀ ခံမည့် နာရီကြီးတစ်လုံး တည်ဆောက်ထုတ်လုပ်နိုင်မည်ဆိုလျှင် မည်သို့ လုပ်မည်နည်း။
တစ်နှစ်လျှင် တစ်ကြိမ်သာရွေ့ပြီး ရာစုနှစ်တစ်ခုလျှင် တစ်ကြိမ်သာ နာရီထိုးသံမြည်ကာ ထောင်စုနှစ်တစ်ခုလျှင် တစ်ကြိမ်သာ ဥသြတွန်သံပေးမည့် နာရီမျိုးလော။
ရေရှည်စီမံကိန်း တွေးခေါ်ပုံနှင့် အနာဂတ်အတွက် ကျွန်ုပ်တို့၏ တာဝန်အမွေအနှစ်ထားခဲ့ပုံကို ထင်ဟပ်မည့် နာရီမျိုးလော။ ဤသည်တို့ကား Amazon တည်ထောင်သူ ဂျက်ဘေးဇော့စ် (Jeff Bezos ) ၏ မျှော်မြင်ချက်ဖြစ်သည်။
ဂျက်ဘေးဇော့စ်က အမေရိကန်ပြည်ထောင်စု၊ တက္ကဆပ်ပြည်နယ်အနောက်ပိုင်းရှိ တောင်တစ်လုံးအတွင်းတွင် ဒေါ်လာ ၄၂ သန်း အကုန်ခံကာ နာရီကြီးတစ်ခု ဆောက်လုပ်မည့် စီမံကိန်းကို အကောင်အထည်ဖော်နေသည်။
ထိုနာရီကို ကွန်ပြူတာ သိပ္ပံပညာရှင်၊ တီထွင်သူ Danny Hillis က ဒီဇိုင်းရေးဆွဲပေးခဲ့ခြင်းဖြစ်ပြီး အင်ဂျင်နီယာ ပညာ၏ အံ့ဖွယ်တစ်ပါးဖြစ်လာရန် ရည်ရွယ်ထားသည်။
(နှစ်ပေါင်း ၁၀၀၀၀ တည်တံ့မည့် နာရီကြီး။ ဓာတ်ပုံ-Long Now Foundation)
နှစ် ၁၀၀၀၀ တည်တံ့မည့် နာရီကြီးသည် စက်ယန္တယားဖြင့် လည်ပတ်မည့် နာရီကြီးဖြစ်ပြီး ကမ္ဘာမြေ၏ အပူဓာတ်ဖြင့် စွမ်းအင်ရယူမည် ဖြစ်သည်။
စက်ပစ္စည်းအစိတ်အပိုင်းများစွာ ပါဝင်မည်ဖြစ်ပြီး Solar Synchronizer ၊ နာရီချိန်သီး၊ နာရီခေါင်းလောင်းထိုး စက် အစရှိသည်တို့ အပါအဝင်ဖြစ်သည်။
နာရီကြီး၏ အမြင့်မှာ ပေ ၅၀၀ ရှိမည်ဖြစ်ပြီး တောင်၏ အမြင့်အတိုင်းဖြစ်မည်ဟု ဆိုသည်။
နာရီကြီးသည် မွန်းတည့်ချိန်သို့ရောက်တိုင်း နေနှင့် ပြန်လည်ချိန်ညှိမည်ဖြစ်ပြီး နှစ်၊ ရာစုနှင့် ထောင်စုနှစ်များကို ခြေရာခံထားမည် ဖြစ်သည်။
နာရီခေါင်းလောင်းထိုးစက်မှာ မတူညီသော ခေါင်းလောင်းထိုးသံပေါင်း ၃ ဒသမ ၅ သန်းကျော် ထုတ်လုပ်နိုင် စွမ်းရှိရာ တစ်ရက်နှင့်တစ်ရက် နာရီထိုးသံ ထပ်မည်မဟုတ်ချေ။
ထို့အပြင် နာရီကြီးတွင် အခန်း ၅ ခန်းပါဝင်မည်ဖြစ်ပြီး ပထမဆုံးနှစ်၊ ၁၀ နှစ်မြောက်၊ နှစ် ၁၀၀ ပြည့်၊ နှစ် ၁၀၀၀ နှင့် နှစ် ၁၀၀၀၀ ပြည့် နှစ်ပတ်လည်ကာလများကို ရည်စူးထားသည့် အခန်းများ ဖြစ်သည်။
ထိုအခန်းများတွင် အချိန်နာရီနှင့် စပ်လျဉ်းသည့် လူ့အသုံးအဆောင်ပစ္စည်းများကို သိမ်းဆည်းထားရှိ ထားသည့် အပြင် အနာဂတ်လူသားတို့အတွက် သတင်းစကားများလည်း ထားရှိထားသည်။
ပထမဆုံးအခန်းတွင် နေအဖွဲ့အစည်း၏ စနစ်ပုံစံ ပါဝင်မည်ဖြစ်ပြီး အခြားအခန်းများတွင်မူ အနာဂတ်မျိုးဆက် တို့က လိုအပ်သည်များ ဆက်လက်ဖြည့်စွက်သွားရမည် ဖြစ်သည်။
(နှစ် ၁၀၀၀၀ နာရီကြီး၏ အတွင်းပိုင်း။ ဓာတ်ပုံ- Long Now Foundation)
(ဂျက်ဘေးဇော့စ်က နှစ်ပေါင်း ၁၀၀၀၀ တည်တံ့မည့်နာရီ ဘာကြောင့် တည်ဆောက်တာလဲ။))
ဂျက်ဘေးဇော့စ်သည် ရေရှည်ကို မျှော်မြင်တွေးခေါ်တတ်သူတစ်ဦးဖြစ်ကာ လူသားတို့တွင် တောက်ပသော အနာဂတ်ရှိမည်ဟု ယုံကြည်သည်။
(နှစ် ၁၀၀၀၀ နာရီအတွက် စက်ပစ္စည်းအစိတ်အပိုင်းများ။ ဓာတ်ပုံ-Long Now Foundation)
((နှစ် ၁၀၀၀၀ နာရီ၏ စိန်ခေါ်မှုများ))
နှစ်ပေါင်း ၁၀၀၀၀ တည်တံ့မည့် နာရီတစ်လုံးနှင့် အခြေခံအဆောက်အအုံများ ဆောက်လုပ်ရသည့်အလုပ်မှာ လွယ်ကူသောအလုပ်တစ်ခုမဟုတ်ချေ။
စေ့စပ်သေချာသည့် အင်ဂျင်နီယာပညာ၊ တိကျသောလက်ရာ၊ အသေးစိတ် စမ်းသပ်မှုများ လိုအပ်သည်။
နာရီသည် အပူချိန်ပြောင်းလဲမှု၊ စိုထိုင်းဆ၊ ဖုန်တက်ခြင်းအစရှိသည်တို့ကို ကြံ့ကြံ့ခံနိုင်ရန် လိုအပ်မည် ဖြစ်သည်။
အနာဂတ်မျိုးဆက်တို့ ဆက်လက်ထိန်းသိမ်းရန် ရိုးရှင်းရမည်ဖြစ်သော်လည်း တိကျမှုရှိရန်နှင့် စိတ်ဝင်စားဖွယ် ကောင်းစေရန် လုံလောက်သော ရှုပ်ထွေးမှုလည်း ရှိမည် ဖြစ်သည်။
(နှစ် ၁၀၀၀၀ နာရီ တည်ဆောက်နေပုံ။ ဓာတ်ပုံ-Long Now Foundation)
(iMyanmarHouse.com Team မှ ရေးသား ဖော်ပြသည်။)
Credit: iMyanmarHouse.com
Ref: Inside mountain where billionaire Jeff Bezos is building clock that will last longer than us (foxnews)
