အနှစ် - ( ၂၀ )ကျော် နေထိုင်ပြီး ဂရန်အမည်ပေါက် ပြောင်းလဲခြင်း မဆောင်ရွက်ခဲ့ဘူးဆိုတော့ အရပ်ကတိအရောင်းအဝယ် စာချုပ်ချုပ်ဆိုပြီး နောက်ပိုင်းမှာ မှတ်ပုံတင် အရောင်းအဝယ်စာချုပ်ရော ချုပ်ဆိုခဲ့ပါသေးလား မှတ်ပုံတင်အရောင်းအဝယ်စာချုပ် ချုပ်ဆိုပြီးဆိုလျှင်တော့ ဂရန်အမည်ပြောင်း လျှောက်ထားခြင်း ဆောင်ရွက်ရလွယ်ကူပါသည်။
ဂရန်မြေအမျိုးအစားမှာ နိုင်ငံတော်နှင့် မြေငှားစာချုပ်ချုပ်ဆိုထားသူကိုသာ မြေပိုင်ရှင်အဖြစ် အသိအမှတ်ပြုပြီး ၎င်းမှသာ တဆင့်လွှဲပြောင်း ရောင်းချခွင့်ရှိကာ အရောင်းမြေပုံကူးယူခြင်း၊ ဂရန်သက် တမ်းတိုးခြင်း၊ အမည်ပြောင်း ဆောင်ရွက်ရာတွင် မှတ်ပုံတင်စာချုပ် ချုပ်ဆိုပိုင်ခွင့်တို့ရှိမည် ဖြစ်ပါသည်။
ယခုမြေကွက်အား လွှဲပြောင်းရောင်းချရာတွင် စည်ပင်သာယာရေးကော်မတီမှ (၁)နှစ် အတွင်း ထုတ်ယူထားသော အရောင်းမြေပုံလဲ လိုအပ်ပြီး အမည်ပေါက်ကိုယ်တိုင် ဂရန်မူရင်းပြ လက်မှတ် ရေးထိုး၍ အရောင်းမြေပုံထုတ်ယူရမည်ဖြစ်ပါသည်။
ထို့ကြောင့် မူလဂရန်အမည်ပေါက်ထံ ဆက်သွယ်စုံစမ်းရန် လိုအပ်ပြီး မြေကွက်မရှိတော့လျှင် ၎င်းမိသားစုမှ အမွေဆက်ခံခွင့်ရှိသူနှင့် အဆက်အသွယ် ရလျှင်လဲ အဆင်ပြေပါသည်။ ဂရန်အမည်ပေါက် သူ မိသားစုဝင်များနှင့် အဆက်အသွယ် ပြုလုပ်နိုင်ခြင်း မရှိပါက တရားရုံးတွင် မှတ်ပုံတင်စာချုပ်ချုပ်ဆို ပေးစေလိုမှုဖြင့် တဖက်သတ်တရားစွဲဆိုကာ အနိုင်ဒီဂရီအမိန့်တရပ် ရယူရမည်ဖြစ်ပါသည်။ ထို့နောက် ဘီလစ်အရာရှိမှ မှတ်ပုံတင်စာချုပ် ချုပ်ဆိုပေးသည့်အခါမှ အမည်ပြောင်း ဆက်လက်ဆောင်ရွက် နိုင်မည်ဖြစ်ကြောင်း ဖြေဆိုရေးသားပေးလိုက်ပါသည်။
ဖြေဆိုသူ - iMyanmarHouse.com ၏ ဥပဒေအကြံပေး ပညာရှင်အဖွဲ့အိမ်ခြံမြေ မေးခွန်းများကို မေးရန် ဤနေရာကို သွားပါ။
