အင်ဒိုနီးရှား အမျိုးသားတစ်ဦးက သားဖြစ်သူကို “ဆက်သွယ်ရေး၊ သတင်းအချက်အလက်နှင့် စာရင်းအင်းဌာန” ဟု ကြံကြံဖန်ဖန် နာမည်ပေးထားမှု လူမှုကွန်ရက်တွင် နာမည်ကြီးနေ

အင်ဒိုနီးရှားတွင် အမျိုးသားတစ်ဦးသည် ၎င်းအလုပ်လုပ်ကိုင်သည့်ဌာန၏ အမည်ကို သားဖြစ်သူ၏ နာမည်အဖြစ် အမည်ပေးထားရာ Dinas Komunikasi Informatika Statistik (ဆက်သွယ်ရေး၊ သတင်းအချက်အလက်နှင့် စာရင်းအင်းဌာန) ဟု ဖြစ်သည်။

အင်ဒိုနီးရှားသတင်းဌာနတစ်ခုဖြစ်သော Kompas က ဖော်ပြသည်မှာ အင်ဒိုနီးရှားနိုင်ငံ၊ ဂျာဗားကျွန်း အလယ်ပိုင်း Brebes ဒေသတွင် နေထိုင်သော အသက် ၃၈ နှစ်အရွယ် ဆလာမက် ယိုဂါ ဝါယုတီ (Slamet Yoga Wahyuti) အမည်ရှိ အမျိုးသားသည် ၎င်း၏ ဇနီးဖြစ်သူ Ririn Linda Dunggal Sari နှင့် သဘောတူထားသည်မှာ သားယောက်ျားလေး မွေးလာပါက မိမိစိတ်ကြိုက် နာမည်ပေးမည်ဟု ဖြစ်သည်။

ပထမဆုံး ရင်သွေးမှာ သမီးမိန်းကလေးဖြစ်ရာ သမားရိုးကျအတိုင်း နာမည်ပေးခဲ့သည်။

ထို့နောက် ၂၀၂၀ ပြည့်နှစ်၊ ဒီဇင်ဘာလ ၂၃ ရက်တွင် သားယောက်ျားလေး မွေးဖွားလာရာ သဘောတူညီထားချက်အတိုင်း ဆလာမက်စိတ်ကြိုက်နာမည်ပေးခွင့်ရခဲ့သည်။

ထို့ကြောင့် ဆလာမက်က သားဖြစ်သူကို “ဆက်သွယ်ရေး၊ သတင်းအချက်အလက်နှင့် စာရင်းအင်းဌာန” ဟု အမည်ပေးခဲ့သည်။

ထိုနာမည်ကို ပထမဆုံး စတင်ကြားရသူတိုင်း ထူးဆန်းအံ့သြမှု ခံစားရမည်ဆိုသည်ကို ဆလာမက်က ဝန်ခံသည်။

“မိန်းမက မကန့်ကွက်တာ ကျေးဇူးတင်ရမှာပါ” ဟု ဆလာမက်က ပြောသည်။

ဆလာမက်သည် ၂၀၀၉ ခုနှစ်မှ စတင်ကာ အစိုးရဝန်ထမ်းအဖြစ် စတင်တာဝန်ထမ်းဆောင်ခဲ့ခြင်း ဖြစ်သည်။

၎င်းတို့ ဇနီးမောင်နှံ၏ မိတ်ဆွေသူငယ်ချင်းများနှင့် မိသားစုဝင်များက ကလေးနာမည်နှင့် ပတ်သက်ပြီး အမျိုးမျိုး ဝေဖန်ကြရာ ဆလာမက်က နာမည်ခေါ်ရလွယ်စေရန် ဒင်ကို (စာရင်းဌာန) ဟု အိမ်နာမည်ပေးခဲ့သည်။

သားဖြစ်သူကို ဘာသာတရားကိုင်းရှိုင်းကာ မိသားစုအပေါ် တွယ်တာသောသူ ဖြစ်လာရန် ဆလာမက်က မျှော်လင့်ထားသည်။

“ဆက်သွယ်ရေး၊ သတင်းအချက်အလက်နှင့် စာရင်းအင်းဌာန” အနေဖြင့် မိမိ၏ အမည်အပြည့်အစုံကို မိတ်ဆက်ရန် အခက်အခဲများနှင့် ရင်ဆိုင်ရဖွယ်ရှိသည်။

သားဖြစ်သူ ကြီးပြင်းလာလျှင် ၎င်း၏ နာမည်အပေါ် မည်သို့သဘောထားမည်ထင်သနည်းဟု မေးရာတွင် ဆလာမက်က သားဖြစ်သူမှာ နောက်ဆုံးတွင် မိမိနာမည်နှင့် ရင်းနှီးသွားလိမ့်မည်ဖြစ်ကြောင်း ပြောသည်။

ဆလာမက်သည် လက်မထပ်မီကတည်းက သားယောက်ျားလေး မွေးလာပါက မိမိ၏ အလုပ်ဌာနအမည် အတိုင်း နာမည်ပေးမည်ဟု ကြိုတင်စိတ်ကူးထားခဲ့ခြင်း ဖြစ်သည်။

ဇနီးလောင်းကိုလည်း လက်မထပ်မီကတည်းက သဘောတူညီချက် တောင်းထားခဲ့သည်။ ဇနီးဖြစ်သူ Linda က သားငယ်ကို ဆလာမက်အမည်ပေးသည့် ထူးဆန်းသည့်နာမည်အပေါ် မကန့်ကွက်ခဲ့။

လင်ဒါ၏ မိဘများကမူ သဘောမတူခဲ့။

သို့သော် လက်မထပ်မီကတည်းက သဘောတူထားသည့်ကိစ္စကို သိရှိသွားချိန်တွင်မူ မကန့်ကွက်တော့ချေ။

“ဆက်သွယ်ရေး၊ သတင်းအချက်အလက်နှင့် စာရင်းအင်းဌာန” ကြီးပြင်းလာပါက ကြောင်စီစီ နာမည်ကြောင့် ၎င်း၏ ငယ်စဉ်ဘဝ ပျက်စီးခဲ့ရမှုနှင့် စပ်လျဉ်းပြီး မိဘများအား တရားစွဲခြင်းမျိုး မလုပ်ရန်သာ ဆုတောင်းရသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Indonesian man names newborn son after department he works in