နီပေါနိုင်ငံတွင် ဘုရားပွဲလာသူတိုင်း တရားဝင် ဆေးခြောက်အသုံးပြုခွင့်ရသော ထူးဆန်းသည့် ဟိန္ဒူဘုရားပွဲ ကျင်းပခဲ့ရာ ကြက်ပျံမကျ စည်ကားခဲ့

နီပေါနိုင်ငံ၏မြို့တော် ခေတ္တမန်ဒူရှိ အထွတ်အမြတ်ထားရာ ဘုရားကျောင်းတစ်ခုတွင် ဟိန္ဒူဘာသာဝင် ထောင်သောင်ချီကာ ပြီးခဲ့သော ဖေဖော်ဝါရီ ၂၆ ရက်က လာရောက်ခဲ့ကြပြီး နီပေါ၏ အကြီးမားဆုံး ဘာသာရေးပွဲတော်များတွင် ပါဝင်သောပွဲတစ်ခု ကျင်းပခဲ့ကြကြောင်း အေပီသတင်းတစ်ရပ်တွင် ဖော်ပြသည်။

နီပေါ၏ အထွတ်အမြတ်အထားခံရဆုံး ဘုရားကျောင်းဖြစ်သော ဟိန္ဒူသိဝနတ်ဘုရားကို ကိုးကွယ်ထားသည့် Pashupati ဘုရားကျောင်းအနီးရှိ ဘန်ကာလီတောအုပ်အတွင်း ဟိန္ဒူဘာသာရေးဆရာများနှင့် ဟိန္ဒူဘာသာဝင်များစွာ ရောက်ရှိလာကာ ဆေးခြောက်ရှူခဲ့ကြသည်။

နီပေါတွင် ဆေးခြောက်ရှူခြင်းကို ဥပဒေအရ တားမြစ်ထားသော်လည်း သိဝ ရာတြီ ပွဲတော်ကာလတွင် ဓလေ့ထုံးတမ်းအနေဖြင့် ခွင့်ပြုပေးထားသည်။

((မှတ်ချက်။ ဥပဒေနယ်ပယ်တွင် ဓလေ့ထုံးတမ်းဥပဒေ ကျင့်သုံးမှုများ နိုင်ငံအသီးသီးတွင် ရှိနေသည်။

ဓလေ့ထုံးတမ်းဥပဒေတွင် ခွင့်ပြုထားသည့် ကိစ္စရပ်များသည် ပုံမှန် ရာဇသတ်ကြီးနှင့် ဆန့်ကျင်နေလေ့ရှိသည်။

သာဓကအားဖြင့် မြန်မာပြည်တွင် နာရေးအိမ်တို့၌ ဖဲကစားခြင်းကို သက်ဆိုင်ရာက အရေးမယူဘဲ ခွင့်ပြုထားကြသည်။ ဓလေ့ထုံးတမ်းဥပဒေအရ ဖြစ်၏။

ပုံမှန် ရာဇသတ်ကြီးဥပဒေအရမူ ဖဲရိုက်ခြင်းမှာ ဥပဒေနှင့် ငြိစွန်းနေသည်ကို တွေ့နိုင်သည်။

မြန်မာပြည်ရှိ တောင်ပေါ်တိုင်းရင်းသားအချို့တွင် လူသတ်မှုဖြစ်ပွားပါက အသတ်ခံရသူ၏ မိသားစုဝင် တစ်ဦးဦးက ပြန်လည်လက်စားချေခြင်းကို ဓလေ့ထုံးတမ်းအဖြစ် ရှေးယခင်က ခွင့်ပြုခဲ့သည်။ နောက်ပိုင်းတွင်မူ ရာဇသတ်ကြီးအရသာ ကျင့်သုံးသည်။))

ဟိန္ဒူဘာသာဝင်တို့သည် ဝတ်ပြုဆုတောင်းခြင်း၊ ဘာသာရေးသီချင်းများဆိုကာ ကခုန်ခြင်းတို့ ပြုလုပ်ခဲ့ကြသည်။

နီပေါနိုင်ငံတွင် လူဦးရေ၏ ၈၁ ရာခိုင်နှုန်းမှာ ဟိန္ဒူဘာသာဝင်များ ဖြစ်ကြသည်။ အိမ်နီးချင်း အိန္ဒိယနိုင်ငံမှ ဟိန္ဒူဘာသာဝင်များစွာလည်း ယခုပွဲတော်သို့ လာရောက်ခဲ့ကြသည်။

သိဝ ရာတြီပွဲတော်တွင် အဓိကကျသော အစိတ်အပိုင်းမှာ ဆေးခြောက်လွတ်လပ်စွာ အသုံးပြုခွင့်ရှိခြင်း ဖြစ်သည်။

သာမန်အချိန်တွင်ဆ်ိုလျှင် နီပေါတွင် ဆေးခြောက်သုံးစွဲပါက ထောင်ဒဏ် ၁ လ ချမှတ်ခံရမည်ဖြစ်ပြီး ရောင်းဝယ်ဖောက်ကားသူဆိုလျှင် ထောင်ဒဏ် ၁၀ နှစ်အထိ ချမှတ်ခံရနိုင်သည်။

(▲ နီပေါနိုင်ငံ၊ ခေတ္တမန်ဒူမြို့ရှိ Pashupatinath ဟိန္ဒူဘုရားကျောင်းတွင် သိဝ ရာတြီပွဲတော်ကာလအတွင်း ဟိန္ဒူဘာသာရေးဆရာတစ်ဦး ဆေးခြောက်ရှူနေပုံကို ၂၀၂၅ ခုနှစ်၊ ဖေဖော်ဝါရီ ၂၆ ရက်က တွေ့ခဲ့ရပုံ။ ဓာတ်ပုံ-AP Photo/ Niranjan Shrestha)

(▲ ဟိန္ဒူဘာသာဝင်တစ်ဦးကပ်လှူသော လဘက်ရည်တစ်ခွက်အား ဘာသာရေးဆရာတို့ သောက်သုံးနေပုံကို နီပေါနိုင်ငံ၊ ခေတ္တမန်ဒူမြို့ရှိ Pashupatinath ဟိန္ဒူဘုရားကျောင်းတွင် သိဝ ရာတြီပွဲတော်ကာလအတွင်း ၂၀၂၅ ခုနှစ်၊ ဖေဖော်ဝါရီ ၂၆ ရက်က တွေ့ခဲ့ရပုံ။ ဓာတ်ပုံ-AP Photo/ Niranjan Shrestha)

(▲ နီပေါနိုင်ငံ၊ ခေတ္တမန်ဒူမြို့ရှိ Pashupatinath ဟိန္ဒူဘုရားကျောင်းတွင် သိဝ ရာတြီပွဲတော်ကာလအတွင်း အမျိုးသားတစ်ဦးက ဆေးခြောက်များထည့်ထားသော စီးကရက်များကို ဟိန္ဒူဘာသာဝင်များအား ရောင်းချပေးခဲ့ပုံကို ၂၀၂၅ ခုနှစ်၊ ဖေဖော်ဝါရီ ၂၆ ရက်က တွေ့ခဲ့ရပုံ။ ဓာတ်ပုံ-AP Photo/ Niranjan Shrestha)

(▲ နီပေါနိုင်ငံ၊ ခေတ္တမန်ဒူမြို့ရှိ Pashupatinath ဟိန္ဒူဘုရားကျောင်းတွင် သိဝ ရာတြီပွဲတော်ကာလအတွင်း ၂၀၂၅ ခုနှစ်၊ ဖေဖော်ဝါရီ ၂၆ ရက်၌ အမျိုးသားတစ်ဦးက ဟိန္ဒူဘာသာဝင်များအား ရောင်းချရန်အတွက် စီးကရက်အတွင်း ဆေးခြောက်များထည့်နေသည်ကို တွေ့ခဲ့ရပုံ။ ဓာတ်ပုံ-AP Photo/ Niranjan Shrestha)

ပွဲတော်သို့လာသော ဟိန္ဒူဘာသာရေးဆရာများနှင့် ဟိန္ဒူဘာသာဝင်များသည် ဘုရားကျောင်းအနီး ဘက်ဂ်မာတီမြစ်ကမ်းတလျှောက်ရှိ တောအုပ်အတွင်း စခန်းချနေထိုင်ပြီး ဆေးခြောက်ရှူကြသည်။

နီပေါလူငယ်များနှင့် မိန်းကလေးအချို့လည်း ပါဝင်ဆင်နွှဲခဲ့ကြသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Tens of thousands gather for Hindu festival at Nepal temple, with many lighting up marijuana joints Photo Credit- AP Photo/ Niranjan Shrestha