အင်္ဂလန်တွင် ၁၈ ကာရက်ရွှေဖြင့် ပြုလုပ်ထားသော ဘိုထိုင် ရွှေအိမ်သာကြီး ခိုးယူခံလိုက်ရ၊ ပိဿာချိန် ၆၀ နီးပါးရှိပြီး ရွှေတန်ကြေးပင်လျှင် ဒေါ်လာ ၃ ဒသမ ၅ သန်းရှိကာ ဒေါ်လာ ၆ သန်းတန် အာမခံ ထားထားသော ရွှေအိမ်သာဖြစ်

အင်္ဂလန်နိုင်ငံ၊ အောက်စ်ဖို့ဒ်ရှိုင်းယားခရိုင်၊ Woodstock မြို့တွင် Blenheim Palace အမည်ရှိ ကျေးလက်စံအိမ်တော်ကြီးတစ်ခု တည်ရှိပြီး ယခင်က Blenheim ရဲတိုက်ဟုခေါ်ကြသည်။

ရှေးယခင်ကမူ နယ်စားကြီးများ ရုံးထိုင်ရာ နေရာဖြစ်ခဲ့ပြီး ယနေ့ကာလတွင်မူ ပြတိုက်တစ်ခုအဖြစ် ပြောင်းလဲထားသည်။

Blenheim အိမ်တော်သည် ဒုတိယကမ္ဘာစစ်ကြီးကို အနိုင်တိုက်ခဲ့သည့် ဗြိတိန်ဝန်ကြီးချုပ် ဝင်စတန်ချာချီ မွေးဖွားရာနေရာဖြစ်သည်။

အဆိုပါအိမ်တော်တွင် ထားရှိသော ရွှေအိမ်သာကြီးမှာ ၂၀၁၉ ခုနှစ်၊ စက်တင်ဘာ ၁၄ ရက်က ခိုးယူခံလိုက်ရကြောင်း အစိုးရရှေ့နေတစ်ဦးက တရားသူကြီးတို့အား ပြီးခဲ့သော တနင်္လာနေ့ (ဖေဖော်ဝါရီ ၂၄) က ပြောသည်။

ထိုဖြစ်ရပ်မှာ ရဲတင်းလွန်းသည့်လုပ်ရပ်ဖြစ်ကြောင်း ရှေ့နေ ဂျူလီယန် ခရစ္စတိုဖာက အောက်စ်ဖို့ရှိ တရားရုံးတွင် ပြောသည်။

ရွှေအိမ်သာ ခိုးယူမှုတွင် ပါဝင်ပတ်သက်သော အမျိုးသား ၃ ဦးအနက် တစ်ဦးမှာ ခိုးယူခဲ့သူဖြစ်ပြီး ကျန် ၂ ဦးမှာ တစ်စစီဖြတ်ကာ ကူညီရောင်းချပေးခဲ့သူများဖြစ်သည်။

ရွှေအိမ်သာကို ပြန်လည်သိမ်းဆည်းရယူနိုင်ခြင်း မရှိတော့ချေ။

တစ်စစီ ဖြတ်တောက်ကာ ရောင်းချခဲ့ကြသည်ဟု ယူဆရသည်။

အဆိုပါ ရွှေအိမ်သာကြီးကို အီတလီမှ ပန်းချီပညာရှင်တစ်ဦးဖြစ်သူ Maurizio Cattelan က ဖန်တီးခဲ့ခြင်းဖြစ်သည်။

ရွှေအိမ်သာ၏ အလေးချိန်မှာ ၂၁၅ ပေါင် ( ၅၉ ဒသမ ၇ ပိဿာ) ရှိကာ ပေါင် ၄ ဒသမ ၈ သန်း (ကန်ဒေါ်လာ ၆ သန်း) ဖြင့် အာမခံ ထားထားသည်ဟု ဆိုသည်။

ခိုးယူခံရချိန်က ရွှေဈေးဖြင့် တွက်မည်ဆိုလျှင်ပင် ပေါင် ၂ ဒသမ ၈ သန်း (ကန်ဒေါ်လာ ၃ ဒသမ ၅ သန်း) တန်ကြေးရှိသည်။

အဆိုပါ အိမ်သာကို ယခင်က အမေရိကန်ပြည်၊ နယူးယောက်မြို့ရှိ The Guggenheim ပြတိုက်တွင် ပြသထားခြင်း ဖြစ်သည်။

ဒေါ်နယ်ထရမ့် ပထမအကြိမ် သမ္မတသက်တမ်း တာဝန်ထမ်းဆောင်စဉ်က အဆိုပါပြတိုက်တွင် ပြသထားသော ဗင်းဆင့်ဗန်ဂိုး၏ Landscape with snow အမည်ရှိ ပန်းချီကားကို အိမ်ဖြူတော်ရှိ သီးသန့်ခန်းတွင် ထားရှိရန် ငှားရမ်းခဲ့ဖူးသည်။

သို့သော် ပြတိုက်တာဝန်ခံက ဗန်ဂိုး၏ ပန်းချီကားကို မငှားရမ်းခဲ့ဘဲ ရွှေအိမ်သာကို ငှားမည်ဟု ထရမ့်ကို အကြောင်းပြန်ခဲ့ဖူးသည်။

ခိုးမှုကျူးလွန်သူဟု သံသယရှိသူ Michael Jones သည် ရွှေအိမ်သာကို မခိုးယူမီတွင် Blenheim အိမ်တော်ကို ၂ ကြိမ်တိုင် လာရောက်စနည်းနာခဲ့သည်။

ရွှေအိမ်သာကို မပြသရသေးမီ တစ်ကြိမ်နှင့် ရွှေအိမ်သာကို အမှန်တကယ်အသုံးပြုနိုင်ရန် တပ်ဆင်ပြသပြီးနောက်ပိုင်း စေ့စေ့စပ်စပ် လေ့လာခဲ့သည့်တစ်ကြိမ်တို့ ဖြစ်သည်။

Blenheim အိမ်တော်တွင် ပြသထားသော ရွှေအိမ်သာကို လာရောက်လည်ပတ်ကြည့်ရှုသူတို့အနေဖြင့် အသုံးပြုလိုပါက စာရင်းပေးသွင်းကာ ၃ မိနစ်အသုံးပြုခွင့်ပေးထားသည်။ လာရောက်စနည်းနာသည့် ၂ ကြိမ်လုံးတွင် Jones က ပြတင်းပေါက်များကို ဓာတ်ပုံရိုက်ယူသွားခဲ့သည်။

နောက်ပိုင်းတွင် အဆိုပါပြတင်းပေါက်မှန်ကိုခွဲကာ Blenheim အိမ်တော်အတွင်း ဝင်ခဲ့ခြင်း ဖြစ်သည်။

၎င်းတို့သည် ရွှေအိမ်သာကို ကြမ်းပြင်မှ ခွာယူခဲ့ရာ အိမ်သာပိုက်လိုင်းထဲမှ ရေများ လျှံကျကုန်ကာ ရှေးဟောင်း အဆောက်အအုံအတွင်း ထိခိုက်ပျက်စီးမှုကြီးမားစွာ ဖြစ်ပေါ်ခဲ့သည်။

အဆိုပါ အဆောက်အအုံသည် ၁၈ ရာစုနှစ်ကတည်းက ဆောက်လုပ်ခဲ့သော အဆောက်အအုံဖြစ်ပြီး ယူနက်စကိုအဖွဲ့ကြီးက ကမ္ဘာ့သမိုင်းဝင်အမွေအနှစ်နေရာအဖြစ် သတ်မှတ်ခံထားရသည့် နေရာ ဖြစ်သည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Prosecutor says golden toilet was stolen from English palace in ‘audacious raid’