ပြင်သစ်တွင် သူခိုးတို့က ခိုးယူလာသော ဘဏ်ကတ်မှ ငွေများဖြင့် ထီထိုးရာ ယူရို ၅၀၀,၀၀၀ (ကန်ဒေါ်လာ ၅၂၃၀၀၀) ထီပေါက်၊ ဘဏ်ကတ်ပိုင်ရှင်က ဆုကြေးငွေ ထက်ဝက်ရလိုကြောင်း တောင်းခံ

ပြင်သစ်နိုင်ငံတွင် သူခိုးတို့သည် ခိုးယူလာသော ဘဏ်ကတ်မှငွေဖြင့် ထီထိုးရာ ယူရို ၅၀၀,၀၀၀ (ကန်ဒေါ်လာ ၅၂၃၀၀၀) ဆုကြီး ထီပေါက်ခဲ့သည်။

သို့သော် ဆုငွေ မထုတ်ယူမီ ပျောက်ကွယ်သွားကြပြီး ယခုအခါ ပြင်သစ်ရဲတပ်ဖွဲ့မှ အလိုရှိဆုံး ဝရမ်းပြေးများ စာရင်းတွင် ပါဝင်နေသည်။

ရဲတပ်ဖွဲ့၏ မှတ်တမ်းများအရ ဘဏ်ကတ် အခိုးခံရသော အမျိုးသား၏ အမည်မှာ Jean-David E ဖြစ်သည်။

Jean က ထီဆုကို ကံထူးသူများနှင့် ခွဲဝေရယူလိုကြောင်း ကမ်းလှမ်းထားသည်။

ထို့အပြင် Jean က သူ၏ ပိုက်ဆံအိတ်ကိုလည်း ပြန်လိုချင်သည်။

သို့သော် သူခိုးများမှာ ဆက်သွယ်ကာ ထုတ်ဖော်ဝန်ခံပါက ဖမ်းဆီးခံရမည့် အန္တရာယ်ကလည်း ရှိသည်။

ပြင်သစ်အစိုးရ၏ ထီဌာနဖြစ်သော La Francaise des Jeux (FDJ) က ပြီးခဲ့သော စနေနေ့တွင် ပြောကြားချက်အရ ဆုရထီလက်မှတ်ကို ဆုငွေထုတ်ရန် တင်ပြလာသူမရှိသေးကြောင်း ထုတ်ပြန်သည်။

“မယုံနိုင်စရာဖြစ်ရပ်ပါပဲ။ ဒါပေမယ့် တကယ်ဖြစ်ခဲ့တာပါ” ဟု Jean ၏ ရှေ့နေဖြစ်သူ Pierre Debuisson က AP သတင်းဌာနသို့ ပြောသည်။

Jean-David သည် ယခုလအစောပိုင်းက ပြင်သစ်တောင်ပိုင်း Toulouse မြို့တွင် ကားထဲမှ ကျောပိုးအိတ် ခိုးယူခံလိုက်ရခြင်းဖြစ်ပြီး ဘဏ်ကတ်များနှင့် အခြားစာရွက်စာတမ်းများ ပါသွားကြောင်း ရှေ့နေက ပြောသည်။

Jean က အဆိုပါဘဏ်ကတ်ကို ပိတ်ပေးရန် ဘဏ်သို့ ဆက်သွယ်အကြောင်းကြားခဲ့သည်။

သူ၏ ဘဏ်ကတ်ဖြင့် ဒေသတွင်းရှိ ဈေးဆိုင်တစ်ဆိုင်တွင် ဈေးဝယ်ထားကြောင်း စစ်ဆေးတွေ့ရှိခဲ့သည်။

အဆိုပါ ဈေးဆိုင်က ပြောသည်မှာ အိမ်ရာမဲ့ဖြစ်ဟန်တူသော အမျိုးသား ၂ ဦးက ဘဏ်ကတ်တစ်ခုဖြင့် ခဲခြစ် ထီလက်မှတ်ဝယ်ယူသွားရာ ထီဆုကြီး ကံထူးသွားခြင်းဖြစ်ကြောင်း ပြောသည်။

“သူတို့ သိပ်ကို ပျော်ရွှင်သွားခဲ့ကြတယ်။ သူတို့ရဲ့ စီးကရက်ဘူးတွေနဲ့ သူတို့ပိုင်တဲ့ ပစ္စည်းတွေကိုတောင် မေ့ပြီး ထားခဲ့ပါတယ်။ ပြီးတော့ အရူးတွေလိုဖြစ်သွားပြီး ထွက်သွားကြတယ်” ရှေ့နေ Debuisson က ပြောသည်။

Jean က ဘဏ်ကတ်ခိုးယူခံရမှုကို ရဲတပ်ဖွဲ့တွင် တိုင်တန်းထားသည်။

သို့သော် သူခိုးများအနေဖြင့် မိမိကို ဆက်သွယ်လာပြီး ဆုငွေထုတ်ကာ ခွဲဝေပေးမည်ဆိုပါက အမှုဖွင့် တိုင်တန်းထားမှုကို ရုပ်သိမ်းပေးမည်ဖြစ်ကြောင်း Jean က ပြောသည်။

“သူတို့ ထွက်မလာရင် ဘယ်သူမှ ဒီဆုငွေကို ရလိမ့်မှာ မဟုတ်ပါဘူး” ဟု Jean က France-2 ရုပ်သံလိုင်းသို့ ပြောသည်။

ရှေ့နေက ပြောသည်မှာမူ တရားမဝင် ထီဆုငွေ ရယူမှုဟု သတ်မှတ်ကာ ဆုငွေကို သိမ်းယူနိုင်ကြောင်း ပြောသည်။

ရှေ့နေက သူခိုးများကို မိမိ၏ ရုံးသို့ ဆက်သွယ်ကာ ညှိနှိုင်းရန် ကမ်းလှမ်းထားသည်။ “ခင်ဗျားတို့မှာ အန္တရာယ်မရှိပါဘူး။ ဆုငွေကို ခင်ဗျားတို့နဲ့ ခွဲဝေ ရယူပါမယ်။ ခင်ဗျားတို့အနေနဲ့လည်း ခင်ဗျားတို့ရဲ့ ဘဝတွေကို ပြောင်းလဲစေနိုင်မှာ ဖြစ်ပါတယ်” ဟု ရှေ့နေက ပြောသည်။

ထီလက်မှတ်မှာ သက်တမ်းကုန်ဆုံးမည့် ကာလရှိကြောင်း ရှေ့နေက သတိပေးသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Thieves used a stolen card to buy a $523,000 lottery ticket. The victim wants to share the winnings (apnews)