ဂျပန်နိုင်ငံတွင် စွန့်ပစ်ထားသော နေအိမ်ပေါင်း ၂၀၀ ကို ဝယ်ယူခဲ့ကာ ပြန်လည် အငှားချထားခြင်းဖြင့် နှစ်စဉ်ဝင်ငွေ ဒေါ်လာ ၉၀၀,၀၀၀ ရရှိနေသော အမျိုးသားအကြောင်း

ဂျပန်အမျိုးသားတစ်ဦးသည် ပျက်စီးယိုယွင်းနေသော စွန့်ပစ်ခံ နေအိမ်ပေါင်း ၂၀၀ ကို အငှားချထားခြင်းမှ ယန်းငွေ သန်း ၁၄၀ (ကန်ဒေါ်လာ ၉၀၀,၀၀၀) ရရှိနေသော ဖြစ်ရပ်အပေါ် အွန်လိုင်းတွင် စိတ်ဝင်စားသူ အလွန်များပြားနေသည်။

ဟယတို့ ကဝမူရ အမည်ရှိ အသက် ၃၈ နှစ်အရွယ် အမျိုးသားသည် ဂျပန်နိုင်ငံ၊ ဟွန်ရှူးကျွန်း၊ အိုဆာကာမြို့တွင် နေထိုင်သူ ဖြစ်သည်။

ကဝမူရသည် ကလေးဘဝကတည်းက နေအိမ်များကို စိတ်ဝင်စားခဲ့သူဖြစ်ကြောင်း ဂျပန်အိမ်ခြံမြေ သတင်းဌာနတစ်ခုဖြစ်သည့် Rakumachi က ဖော်ပြသည်။

ဆယ်ကျော်သက်အရွယ်က တောင်ထိပ်ပေါ်ရှိ ရှုခင်းကြည့်အဆောင်မှတဆင့် မြို့၏ နေအိမ်အမျိုးမျိုးကို ကြည့်ရှုကာ ပျော်ရွှင်နေခဲ့သူ ဖြစ်သည်။

ကျောင်းတက်စဉ် ကာလများတွင်လည်း ကဝမူရသည် အိမ်ခြံမြေအပေါ် စိတ်ဝင်စားနေခဲ့ပြီး ချစ်သူမိန်းကလေး နှင့် ချိန်းတွေ့စဉ်ကာလများအတွင်းတွင်ပင် အိမ်ခြံမြေ သွားရောက်ကြည့်ရှုခြင်းများ ပြုလုပ်ခဲ့သည်။

ထိုအချိန်က ကဝမူရတွင် အိမ်ဝယ်နိုင်မည့်ငွေ မရှိသေးသော်လည်း အားလပ်ချိန်တိုင်းတွင် အိမ်ခြံမြေ အကြောင်းကိုသာ လေ့လာနေခဲ့သည်။

ဘွဲ့ရပြီးသောအခါ ကဝမူရသည် အိမ်ခြံမြေအငှားကုမ္ပဏီတစ်ခုတွင် ဝင်ရောက်လုပ်ကိုင်ခဲ့သည်။

(ဟယတို့ ကဝမူရသည် ပျက်စီးယိုယွင်းနေသော အိမ်များကို ဝယ်ယူကာ ပြန်လည်အငှားချထားခြင်းများ ပြုလုပ်သည်။ ဓာတ်ပုံ-QQ.Com )

ထိုသို့ လုပ်ကိုင်နေရင်း ကဝမူရ၏ အထက်ခေါင်းဆောင်မှာ ကုမ္ပဏီမှ စီမံခန့်ခွဲရေးအဖွဲ့နှင့် အငြင်းပွားခဲ့ပြီး နောက်ပိုင်း ရာထူး လျှော့ချ ခံလိုက်ရရာ အခြားသူအတွက် အလုပ်လုပ်ပေးနေရခြင်းမှာ ဘဝအာမခံချက် မရှိကြောင်း ကဝမူရ စတင်ခံစားမိလာသည်။

“ရာထူးတိုးတာတွေဟာ အရည်အချင်းနဲ့မဆိုင်ဘူး၊ အထက်လူ ကိုယ့်ကို သဘောကျမကျနဲ့ပဲ ဆိုင်တယ်ဆိုတာ ကျွန်တော်သိလာပါတယ်”

ထိုအချိန်မှစပြီး ကဝမူရသည် နေအိမ်ပိုင်ဆိုင်သူတစ်ယောက် ဖြစ်လာစေရန် ဆုံးဖြတ်ကာ ငွေစတင် စုဆောင်းခဲ့သည်။

အသက် ၂၃ နှစ်အရွယ်တွင် လေလံတင်ရောင်းချသော တိုက်ခန်းတစ်ခန်းကို ယန်းငွေ ၁ ဒသမ ၇ သန်း (ကန်ဒေါ်လာ ၁၀၈၀၀) ဖြင့် ဝယ်ယူခဲ့သည်။

ထိုအခန်းကို အငှားချထားရာ နှစ်စဉ်ဝင်ငွေ ယန်း ၃၄၀,၀၀၀ ရရှိခဲ့ပြီး ၆ နှစ်အကြာတွင် ယန်း ၄ ဒသမ ၃ သန်း ဖြင့် ပြန်လည် ရောင်းထုတ်ခဲ့သည်။

ယင်းနောက်ပိုင်း ကဝမူရက ကျေးလက်ဒေသများရှိ ပျက်စီးယိုယွင်းနေသောအိမ်များကို ပစ်မှတ်ထားခဲ့သည်။

ထိုအိမ်အများစု၏ ဈေးနှုန်းမှာ ယန်း ၁ သန်းအောက်သာ ရှိသည်။

ကဝမူရက ငွေကြေးအနည်းငယ်မျှသာ သုံးစွဲကာ ပြန်လည်မွမ်းမံမှု ပြုလုပ်ပြီး လျင်မြန်စွာ အငှားချထားသည်။

၂၀၁၈ ခုနှစ်တွင် Merryhome အမည်ဖြင့် ကိုယ်ပိုင်အိမ်ခြံမြေကုမ္ပဏီကို စတင်တည်ထောင်သည်။

ပြီးခဲ့သော နှစ်အနည်းငယ်အတွင်း ကဝမူရသည် ယိုယွင်းနေသော နေအိမ်ပေါင်း ၂၀၀ ဝယ်ယူခဲ့ပြီး ပြန်လည်အငှားချထားမှုမှ ဝင်ငွေ နှစ်စဉ် ယန်း သန်း ၁၄၀ ကျော် ရရှိနေသည်။

(သူ၏ နေအိမ်တစ်လုံးကို ကဝမူရ စစ်ဆေးကြည့်ရှုနေပုံ။ ဓာတ်ပုံ-QQ.Com)

“ကျွန်တော် နေ့ချင်းညချင်း ချမ်းသာဖို့ ဘယ်တုန်းကမှ မမျှော်လင့်ခဲ့ပါဘူး။ အိမ်ခြံမြေ ရင်းနှီးမြှုပ်နှံမှုဟာ ရေရှည် ကစားပွဲတစ်ခုပါ။ စိတ်ရှည်ဖို့ ၊ ဂရုထားဖို့ လိုပါတယ်”ဟု ကဝမူရက ပြောသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Japan man buys 200 decayed houses, generates US$900,000 in annual rent, captures attention Photo Credit-QQ.com