ပြည်ပ အိမ်ခြံမြေ သတင်း | Posted by ရွှေစင်ဝင်း
ဗြိတိန်တွင် အိမ်ငှားနေထိုင်ရခြင်းသည် မလွယ်ကူဟူသော အချက်မှာ လျှို့ဝှက်ချက် မဟုတ်ချေ။
အခက်အခဲ တစ်မျိုးမဟုတ်တစ်မျိုး ကြုံရသည်။
ခေါင်ခိုက်လှသော အိမ်လခနှင့် ရင်မဆိုင်ရပါက ပြဿနာရှာတတ်သော အခန်းဖော်များ၊ မှိုစွဲခြင်း ပေါင်းသင်းဆက်ဆံရ ခက်ခဲသော အိမ်ရှင်နှင့် ကြုံရခြင်းတို့ ရင်ဆိုင်ကြရသည်။
Gen Z (၁၉၉၅ မှ ၂၀၁၀ ကြား မွေးဖွားသူများ) နှင့် Millennials (၁၉၈၁ မှ ၁၉၉၆ ခုနှစ်ကြား မွေးဖွားသူများ) တို့မှာ အိမ်ငှားမျိုးဆက်ဟု အမည်တွင်နေသည်။
လန်ဒန်တွင် လစာ၏ ၅၀ ရာခိုင်နှုန်းခန့်အထိကို အိမ်လစာအတွက် အသုံးပြုနေကြရသည်။
လန်ဒန်မြို့၏ ပျမ်းမျှအိမ်လခမှာ ၁၆၂၅ ပေါင်အထိ ရှိနေသည်။
♦ အိမ်ငှားအမည်-Jess (အသက် ၂၄) တည်နေရာ-လန်ဒန်မြို့ အိမ်လခ-၉၉၇ ပေါင် ခုနှစ်-၂၀၂၃
“ကျွန်တော့်ချစ်သူ ကောင်မလေးနဲ့ ကျွန်တော်ဟာ အမြဲအခြေချနေထိုင်ဖို့ နေရာတစ်ခု ရှာဖွေနေတဲ့ ကာလအတွင်းမှာ အခန်းတစ်ခန်းကို အိမ်လခ စပ်တူကျခံရင်း ၆ လလောက်နေထိုင်ခဲ့ကြပါတယ်”
“အခန်းငှားတဲ့စာချုပ်မှာ ပန်ကာတွေ မသုံးရဘူးလို့ ပါပါတယ်။ ပန်ကာသုံးမယ်ဆိုရင် တစ်ပတ်ကို ၁၀ ပေါင် ပေးရမယ်လို့လည်း ပါတယ်”
“ဒီစည်းကမ်းကို ကျွန်တော် ချိုးဖောက်တယ်၊ မချိုးဖောက်ခဲ့ဘူးဆိုတာ ကျွန်တော်မပြောချင်ပါဘူး။ ဒါပေမယ့် နွေရာသီမှာ အပူချိန်က ၃၀ ဒီဂရီစင်တီဂရိတ်ရှိနေပြီး ကျွန်တော့်အခန်းက sauna တစ်ခုလို ဖြစ်နေတယ်”
(အမျိုးသမီးတစ်ဦးကမူ ငှားရမ်းနေထိုင်သောအခန်းမှ စာချုပ်သက်တမ်းမပြည့်မီ ပြောင်းရွှေ့ခဲ့သည်။ ဓာတ်ပုံ-Getty Images)
♦ အိမ်ငှားအမည်- Laura (အသက် ၃၀ နှစ်) တည်နေရာ-လန်ဒန် အိမ်လခ-ပေါင် ၆၅၀ ခုနှစ်-၂၀၁၆
“တခါတုန်းက တိုက်ခန်းတစ်ခန်းမှာ မီးဖိုဆောင် ဘေစင်ကို တခြားလူ ၇ ယောက်နဲ့ မျှဝေသုံးခဲ့ရပါတယ်။ အဲဒီ ဘေစင်က ရေပေါက်ပိတ်သွားပြီး ရေညိုပုပ်ပုပ်တွေက တခန်းလုံး လျှံကျကုန်ပါတယ်။ နည်းလမ်းမျိုးစုံ လုပ်ခဲ့ပေမယ့် မရတာကြောင့် အိမ်ရှင်ကို ခေါ်ခဲ့ရတယ်”
“သူက ပေါင်းသင်းရတော်တော်ခက်တဲ့သူပါ။ ကျွန်မထင်တာက သူ့အနေနဲ့ နည်းနည်းပါးပါးတော့ ကူညီမယ်ထင်ခဲ့တာ။ အနည်းဆုံး သူ့အိမ်မပျက်စီးစေဖို့ပေါ့။ အဲ့လို မဟုတ်ပါဘူး။ သူက လာကြည့်ဖို့ ၊ ပြင်ပေးမယ့်သူ ခေါ်ပေးဖို့ ငြင်းခဲ့ပါတယ်။ ဆာလ်ဖြူရစ် အက်ဆစ်ဝယ်ပြီး ဘေစင်ပေါက်ထဲကို လောင်းထည့်ဖို့ပဲ ပြောပါတယ်”
“ဒီအက်ဆစ်က တော်တော်ပြင်းပါတယ်။ ရေနဲ့ထိတွေ့ရင် တော်တော်ဆိုးဆိုးရွားရွားတွေဖြစ်နိုင်တယ်။ ကျွန်မက ဓာတုဆေးတွေ အများကြီးလည်း သုံးခဲ့ပြီးပြီ။ ဒါကြောင့် ဒီနည်းလမ်းကို သဘောမကျဘူးလို့ သူ့ကို ပြောခဲ့တယ်”
“ဒီအခါမှာ သူအတော်ဒေါသထွက်သွားပြီး ကျွန်မကို သုံးစားမရဘူးလို့ ပြောပြီး ရက်အနည်းငယ်အတွင်း အိမ်မပြောင်းပေးဘူးဆိုရင် အိမ်ပေါ်က ဆွဲချမယ်။ သော့တွေပြောင်းမယ်လို့ ခြိမ်းခြောက်ပါတယ်။ ကျွန်မကလည်း မိုက်မဲစွာနဲ့ အိမ်ငှားစာချုပ်ချုပ်မထားမိဘူး။ ဒါကြောင့် အိမ်ပြောင်းဖို့ ဆုံးဖြတ်ခဲ့ရတယ်”
“နောက်ပိုင်းကျ အဲဒီမှာ ကျန်ခဲ့သူတွေဆီက သတင်းကြားပါတယ်။ အိမ်ရှင်ရောက်လာပြီး ဘေစင်ပေါက်ထဲကို ဆာလ်ဖြူရစ် အက်ဆစ်တွေ လောင်းထည့်တာ မီးဖိုဆောင်တစ်ခုလုံး ပျက်ဆီးသွားတယ်တဲ့”
♦ အိမ်ငှားအမည်-Will (၂၃ နှစ်) တည်နေရာ-လန်ဒန် အိမ်လခ-၈၇၅ ပေါင် ခုနှစ်-၂၀၂၄
“ကျွန်တော် လန်ဒန်မှာ အခန်းငှားနေတော့ သတိပြုမိတာက ကျွန်တော့်အခန်းဖော်တွေထဲက မိန်းကလေးတစ်ဦးနဲ့အတူ သူ့ကောင်လေး တချိန်လုံးရှိနေတဲ့အချက်ပါ။”
“သူတို့က သူတို့အခန်းထဲမှာ သူတို့နေကြတာဆိုတော့ ကျွန်တော့်ကိစ္စတော့ မဟုတ်ပါဘူး။ တမနက်မှာ အိမ်ရှင်ဆီက ကျွန်တော်တို့ဆီကို မက်ဆေ့တစ်စောင်ဝင်လာတယ်။ ညအိပ်ညနေ တည်းခိုမယ့် ဧည့်သည်ရှိရင် သူ့ဆီကနေ ခွင့်ပြုချက်ယူရမယ့်အကြောင်း၊ ဧည့်သည်အတွက် တစ်ညကို ၁၀ ပေါင် ပေးရမယ့်အကြောင်း ပြောထားပါတယ်။”
“ကောင်မလေးဆီကို ဧည့်သည်လာတာ အိမ်ရှင်ဘယ်လိုသိသွားတယ်ဆိုတာ တွေးမရခဲ့ဘူး။ မိန်းကလေးက ကျွန်တော်ပြောတယ်လို့ ထင်သွားမှာ စိုးရိမ်ခဲ့မိတယ်။ ဒါပေမယ့် နောက်မှ သိလာတာက အထပ်တိုင်းရဲ့ လှေကားတွေမှာ ကင်မရာတွေ တပ်ထားတာကြောင့် အိမ်ရှင်အနေနဲ့ ဘယ်အခန်းကို ဧည့်သည်လာတယ် ဆိုတာ သိနေနိုင်ပါတယ်”
အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။
ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
(iMyanmarHouse.com Team မှ ရေးသား ဖော်ပြသည်။)
Credit: iMyanmarHouse.com
Ref: A £10 guest fee and a non-existent kitchen: 6 renters share their wildest UK landlord stories Photo Credit-Getty Images
