ထူးထူးခြားခြားကမ္ဘာတလွှား- သိပ္ပံပညာရှင်တို့က ကမ္ဘာ့အကြီးမားဆုံး သက်ရှိသတ္တဝါကြီးကို ပင်လယ်ရေအောက်တွင် ရှာဖွေတွေ့ရှိ၊ အလျား ၁၁၁ ပေရှိ သန္တာကောင်အသိုက်အုံဖြစ်ပြီး အသက် ၃၀၀ ကျော်ရှိပြီဖြစ်

ပင်လယ်သမုဒ္ဒရာတို့တွင် သန္တာကျောက်တန်းများစွာရှိနေပြီး ယင်းတို့သည် ကျွန်ုပ်တို့ ကမ္ဘာမြေ၏ ရတနာများဖြစ်ကာ များစွာသော ပင်လယ်သတ္တဝါတို့အတွက် ခိုလှုံရာလည်း ဖြစ်သည်။

ယခုအခါ သိပ္ပံပညာရှင်တို့က ဆော်လမွန်ကျွန်းစုတွင် တစ်ကမ္ဘာလုံး၌ အကြီးမားဆုံးသော သန္တာကောင်ကြီး (သို့မဟုတ်) သန္တာကောင်အသိုက်အုံကို ရှာဖွေတွေ့ရှိခဲ့သည်။

သန္တာကောင်သည် ၎င်းနှင့်မျိုးဗီဇထပ်တူ တူညီသောသန္တာကောင်တို့ကို ဖန်တီးထုတ်လုပ်ရာမှ သန္တာကောင်အသိုက်အုံဖြစ်တည်လာသည်။ တစ်ကောင်နှင့် တစ်ကောင်ကြား အမြှေးပါးဖြင့် ဆက်သွယ်ထားသည်။

နှစ်ရာထောင်ချီကြာမြင့်လျှင် သန္တာကောင် အသိုက်အုံများမှာ အလွန်ကြီးထွားလာသည်။ သန္တာကောင် အသိုက်အုံများအချင်းချင်း ပေါင်းစည်းသွားမိချိန်တွင် သန္တာကျောက်တန်းများ ဖြစ်ထွန်းလာသည်။

တောင်ပစိဖိတ်သမုဒ္ဒရာရှိ ကျွန်းစုအုပ်စုဖြစ်သော ဆော်လမွန်ကျွန်းစု၏ နွေးထွေးသော ပြာလဲ့လဲ့ရေပြင်အောက်တွင် ကမ္ဘာ့အကြီးမားဆုံး ပင်လယ်သတ္တဝါ (သို့မဟုတ်) သန္တာကောင်အသိုက်အုံ ရှိနေသည်။

အရွယ်အစားမှာ အကြမ်းဖျင်းပြောရလျှင် ဘတ်စ်ကက်ဘောကွင်း ၂ ကွင်းစာခန့်ရှိသည်။

ဆော်လမွန်ကျွန်းစုတွင် ပြီးခဲ့သော ဗုဒ္ဓဟူးနေ့က သုတေသနပညာရှင်များနှင့် ရုပ်ရှင်ဒါရိုက်တာများ တွေ့ရှိခဲ့ကြသည်မှာ ကမ္ဘာ့အကြီးမားဆုံး သန္တာကောင်အသိုက်မြုံကြီး ဖြစ်သည်။

သန္တာကောင်အသိုက်မြုံတွင် မျိုးဗီဇထပ်တူညီသော သန္တာကောင် သန်းနှင့်ချီကာရှိနေပြီး အလျား ၁၀၄ ပေ၊ အနံ ၁၁၁ ပေ၊ အမြင့် ၁၈ ပေရှိသည်။

အရွယ်အစားကြီးမားလှသောကြောင့် ကောင်းကင်မှပင် တွေ့မြင်နိုင်သည်။

သုတေသနပညာရှင်များ ထုတ်ပြန်ခဲ့သော ဓာတ်ပုံများအရ Pavona clavus မျိုးစိတ်သန္တာကောင် အသိုက်မြုံ သည် အဖုလေးများ စုဝေးနေသော အညိုရောင် တောင်ပူစာတစ်ခုသဖွယ် ဖြစ်သည်။

အနီးကပ်ဓာတ်ပုံများအရ အဝါ၊ အစိမ်းနှင့် ခရမ်းရောင်တို့ဖြင့် အသွေးစုံလင်သည်ကို တွေ့ရသည်။

သန္တာကောင်တို့၏ ပုံတူမျိုးပွားမှုနှုန်းမှာ အလွန်နှေးကွေးရာ ယခုသန္တာအသိုက်၏ အရွယ်အစားအရ ရာစုနှစ်များစွာ ကြာမြင့်ခဲ့ပြီဟု ခန့်မှန်းနိုင်သည်။

(ရေငုပ်သမားကို ကြည့်လျှင် သန္တာအသိုက်ကြီး၏ အရွယ်အစားကို ခန့်မှန်းကြည့်နိုင်သည်။ ဓာတ်ပုံ-Manu San Felix/ National Geographic Pristine Seas)

(အနီးကပ်ဓာတ်ပုံကို ကြည့်လျှင် ပင်လယ်ရေသတ္တဝါများ သန္တာအသိုက်ဆီတွင် ပေါက်ဖွားကျက်စားနေသည်ကို တွေ့နိုင်သည်။ ဓာတ်ပုံ-Manu San Felix/ National Geographic Pristine Seas)

“ဒီလို အလွန်ထူးခြားတဲ့အရာမျိုးကို တွေ့ခွင့်ရတာဟာ အိပ်မက်လိုပါပဲ” ဟု ရေအောက်ဓာတ်ပုံဆရာ၊ အဏ္ဏဝါဇီဝဗေဒပညာရှင်ဖြစ်သူ Manu San Felix က Vox သတင်းဌာနသို့ ပြောသည်။

ဆော်လမွန်ကျွန်းစုရှိ ရေအောက် သန္တာသိုက်ကြီးကို ပထမဆုံးတွေ့ရှိခဲ့သူဖြစ်ပြီး ပြီးခဲ့သောလအတွင်း တွေ့ခဲ့ခြင်း ဖြစ်သည်။

“နပိုလီယံ သက်ရှိထင်ရှားရှိခဲ့တဲ့အချိန်ကတည်းက ဒီအရာ တည်ရှိနေခဲ့တာဖြစ်ပါတယ်”

National Geographic အတွက် Malaulalo အမည်ရှိ ကျွန်းတစ်ကျွန်းအနီး ရုပ်ရှင်ရိုက်ကူးနေစဉ် ယခုသန္တာသိုက်ကို ရှာဖွေတွေ့ရှိခဲ့ခြင်း ဖြစ်သည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Scientists just discovered a sea creature as large as two basketball courts. Here’s what it looks like. (vox)

Photo Credit- Manu San Felix/ National Geographic Pristine Seas