ဆာ အဲလက်စ် ဖာဂူဆန်က ဇနီးဖြစ်သူ ကေသီကွယ်လွန်သွားသောကြောင့် နေအိမ်ကို ပေါင် ၃ ဒသမ ၂ သန်းဖြင့် ရောင်းချကာ ရွာကလေးတစ်ခုသို့ ရွှေ့ပြောင်းအခြေချ

မန်ချက်စတာ ယူနိုက်တက်၏ ဂန္ထဝင်ကြီး ဆာ အဲလက်စ် ဖာဂူဆန်သည် ဇနီးဖြစ်သူ ကေသီကွယ်လွန်ပြီးနောက် ချက်ရှိုင်းယားခရိုင်၊ ဝင်စလိုမြို့ (မန်ချက်စတာ၏ တောင်ဘက် ၁၁ မိုင်အကွာ) ရှိ စံအိမ်ကို ၂၀၂၃ နှစ်ကုန်ပိုင်းတွင် ပေါင် ၃ ဒသမ ၅ သန်းဈေးခေါ်ကာ အရောင်းဈေးကွက်တင်ထားခဲ့ရာ ကာလအတန်ကြာ ရောင်းမထွက်ခဲ့။

ဖာဂူဆန်၏ အိမ်မှာ အိပ်ခန်း ၅ ခန်းပါဝင်ကာ အကျယ်အဝန်း စတုရန်းပေ ၇၀၀၀ ရှိပြီး open plan မီးဖိုဆောင်နှင့် ဂိမ်းကစားခန်းတို့ ပါဝင်သည်။

ဖာဂူဆန်က အမြန်ရောင်းထုတ်လိုသောကြောင့် နောက်ပိုင်းတွင် ပေါင် ၃ ဒသမ ၂ သန်းသို့ ဈေးလျှော့ပေးလိုက်ချိန်တွင် ရောင်းထွက်သွားခဲ့သည်။

(ဆာ အဲလက်စ်ဖာဂူဆန်၏အိမ်မှာ ချက်ရှိုင်းယားခရိုင်၊ ဝင်စလိုမြို့တွင်ရှိပြီး စတုရန်းပေ ၇၀၀၀ ကျယ်ဝန်းသည်။ ဓာတ်ပုံ-Andy Kelvin)

(ဖာဂူဆန်၏ နေအိမ် အဝင်ခန်းမတွင် စက္ခုပသာဒ ဖမ်းစားနိုင်သော မီးပန်းဆိုင်းကြီးတစ်ခု တွေ့ရသည်။ ဓာတ်ပုံ-LY Property Cheshire)

ဝယ်ယူသွားသူ၏ အမည်ကိုမူ ထုတ်ဖော်သိရှိရခြင်းမရှိချေ။

“ကျယ်ကျယ်ဝန်းဝန်းရှိတဲ့ ဒီလုံးချင်းအိမ်ဟာ ချက်ရှိုင်းယားရဲ့ လူကြိုက်အများဆုံးလမ်းတစ်ခုမှာ တည်ရှိပါတယ်” ဟု ဖာဂူဆန်ဘက်မှ အကျိုးဆောင်ပေးခဲ့သော အိမ်ခြံမြေအကျိုးဆောင်တို့က ပြောသည်။

“သီးသန့် ဂိတ်ဝန်းခတ်အကွက်တစ်ခုမှာ တည်ရှိပါတယ်။ ဝင်စလိုမြို့လယ်နဲ့ ဘူတာရုံကို လမ်းလျှောက်သွားရုံနဲ့ ရောက်နိုင်ပါတယ်။”

ဖာဂူဆန်နှင့် ဇနီးဖြစ်သူ လေဒီ ကေသီတို့သည် ယခုအိမ်သို့ ၂၀၁၀ ပြည့်နှစ်တွင် ပြောင်းရွှေ့ခဲ့ကြခြင်းဖြစ်သည်။

ယခုအိမ်မှဆိုလျှင် မန်ချက်စတာ ယူနိုက်တက်အသင်း၏ ကာရင်တန် လေ့ကျင့်ရေးကွင်းသို့ အချိန်တိုအတွင်း သွားနိုင်သည်။

ဖာဂူဆန်တို့ ဇနီးမောင်နှံသည် ဝင်စလိုမြို့နေအိမ်တွင် ဆယ်စုနှစ် တစ်ခုကျော် အတူတကွ နေထိုင်ခဲ့ကြသည်။

သို့သော် ပြီးခဲ့သော ၂၀၂၃ ခုနှစ်၊ အောက်တိုဘာလတွင် ကေသီ ကွယ်လွန်သွားချိန်တွင် ဖာဂူဆန်က နှစ်ဦးအတူနေခဲ့သောအိမ်ကို အရောင်းဈေးကွက်တင်ခဲ့ခြင်း ဖြစ်သည်။

ထိုသို့ ရောင်းထုတ်ပြီးနောက်ပိုင်း ဖာဂူဆန်သည် သားဖြစ်သူ Darren ၊ မြေးများနှင့် နီးနီးနားနား နေထိုင်နိုင်ရန်အတွက် Goostrey ကျေးရွာရှိ ပေါင် ၁ ဒသမ ၂ သန်းတန် နေအိမ်သို့ ပြောင်းရွှေ့ခဲ့သည်။

ဖာဂူဆန်၏ သားဖြစ်သူ Darren သည် လက်ရှိအားဖြင့် League One ကလပ်ဖြစ်သော Peterborough United တွင် မန်နေဂျာဖြစ်နေသည်။

(ဆာ အဲလက်စ်သည် ဇနီးဖြစ်သူ ကေသီကွယ်လွန်ချိန်တွင် နှစ်ဦးအတူနေခဲ့သောအိမ်ကို ရောင်းချခဲ့သည်။ ဓာတ်ပုံ-Reuters)

(ဖာဂူဆန်၏ ဂိမ်းကစားခန်း။ ဓာတ်ပုံ- LY Property Cheshire)

(ဖာဂူဆန်၏ master bedroom ။ ဓာတ်ပုံ-LY Property Cheshire)

(စကော့တလန် အကွက်အဆင် ကော်ဇောခင်း လှေကား။ ဓာတ်ပုံ- LY Property Cheshire)

(ခမ်းနားထည်ဝါသော ရေချိုးခန်း။ ဓာတ်ပုံ- LY Property Cheshire)

(မန်ချက်စတာ ယူနိုက်တက်ကို တစ်ခေတ်ထွန်းစေခဲ့သော မန်နေဂျာကြီး ဖာဂူဆန်၏ နေအိမ်။ ဓာတ်ပုံ-News Group Newspaper Ltd)

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Sir Alex Ferguson sells £3.2m luxury home as ex-Man Utd boss moves to nearby village (mirror)

Photo Credit- LY Property Cheshire, Andy Kelvin, Reuters, News Group Newspaper Ltd