ဆင်းရဲချမ်းသာ ကွာဟသော ဘဝများ (သို့မဟုတ်) ဒေါ်လာ ၆ သန်းတန် ငှက်ပျောသီးတစ်လုံးနှင့် တစ်နာရီလျှင် ၁၂ ဒေါ်လာသာရသော သစ်သီးဆိုင်ဝန်ထမ်း အသက် ၇၄ နှစ်အရွယ် အဘိုးအိုအကြောင်း

နယူးယောက်မြို့တွင် တရုတ်ပြည်မှ လုပ်ငန်းရှင်တစ်ဦးက နံရံတွင် တိပ်ဖြင့်ကပ်ထားသော ငှက်ပျောသီးတစ်လုံး (အနုပညာပုံဖော်မှုဟုဆိုသည်) ကို ဒေါ်လာ ၆ ဒသမ ၂ သန်းဖြင့် လေလံဆွဲ ဝယ်ယူခဲ့၏။

ငှက်ပျောသီးတစ်လုံးကို ဒေါ်လာ ၆ သန်းကျော်ပေးကာ ဝယ်ယူပြီး စားပြလိုက်သော လုပ်ငန်းရှင်၏ အမည်မှာ ဂျပ်စတင် ဆွန်း ဖြစ်သည်။

ငှက်ပျောသီးကို တိပ်ဖြင့် နံရံတွင်ကပ်ထားကာ အနုပညာပုံဖော်မှုပြုလုပ် လေလံတင်ခဲ့သည့်နေရာမှာ နယူးယောက်ရှိ Sotheby’s ၏ ရုံးတွင် ဖြစ်ပြီး ငှက်ပျောသီးရောင်းချပေးလိုက်သည်မှာ ရုံးနှင့် မျက်နှာချင်းဆိုင်တွင်ရှိသော လမ်းဘေးသစ်သီးဆိုင်မှ ဖြစ်ကာ တစ်လုံးလျှင် ၂၅ ပြား (25 Cents) ဖြင့် ဝယ်ယူခဲ့ခြင်း ဖြစ်သည်။

သစ်သီးဆိုင်ဝန်ထမ်းအဘိုးအိုမှာ သူ၏ဆိုင်မှ ၂၅ ပြားဖြင့် ဝယ်သွားသော ငှက်ပျောသီးမှာ ဒေါ်လာ ၆ သန်းကျော်ဖြင့် အရောင်းအဝယ်ဖြစ်သွားသည်ကို သိရချိန်တွင်များစွာ တုန်လှုပ်သွားခဲ့သည်ဟု ဆိုသည်။

ယခုအခါ နယူးယောက်မြို့သားများနှင့် ငှက်ပျောသီးကို ဒေါ်လာ ၆ သန်းကျော် ပေးကာ ဝယ်စားခဲ့သော လုပ်ငန်းရှင်တို့က အဘိုးအိုအား ပံ့ပိုးကူညီမှုများပေးရန် လုပ်ဆောင်နေကြသည်။

အဘိုးအို၏ အမည်မှာ ရှားအလမ်ဟု ခေါ်ပြီး နယူးယောက်မြို့၊ Upper East Side ရှိ Sotheby’s လေလံရုံးအပြင်ဘက် လမ်းဘေးသစ်သီးဆိုင်တွင် အလုပ်လုပ်သူဖြစ်ကာ တစ်နာရီလျှင် ၁၂ ဒေါ်လာ ရသည်။

အီတလီမှ installation အနုပညာရှင် Maurizio Cattelan က အဘိုးအို၏ဆိုင်မှ ငှက်ပျောသီးကို ဝယ်ယူကာ နံရံတွင် မိုးကာတိပ် (duct tape) ဖြင့်ကပ်ပြီး အနုပညာတင်ဆက်မှု ပြုလုပ်ခဲ့ရာတွင် သူ၏လက်ရာကို Comedian ဟု အမည်ပေးခဲ့သည်။

 (Sotheby’s ရုံးတွင် ပြခန်းနံရံ၌ မိုးကာတိပ်ဖြင့် ကပ်ထားသော ငှက်ပျောသီးတစ်လုံးကို ကန်ဒေါ်လာ ၆ ဒသမ ၂ သန်းဖြင့် ရောင်းချခဲ့သည်။ ဓာတ်ပုံ-AFP via Getty Images)

လေလံပွဲတွင် မိုးကာတိပ်ကပ်ထားသော ငှက်ပျောသီးကို ဒေါ်လာ ၈၀၀,၀၀၀ ဈေးပေးကာ လေလံစဖွင့်ခဲ့သည်။

ထို့နောက် လေလံပွဲစတင်ပြီး ၅ မိနစ်အတွင်း တရုတ်ပြည်မှ Cyrptocurrency ကုမ္ပဏီပိုင်ရှင်က လေလံအောင်သွားခဲ့သည်။

ငှက်ပျောသီးအတွက် ဒေါ်လာ ၅ ဒသမ ၂ သန်းအပြင် လေလံကုမ္ပဏီကို ဒေါ်လာ ၁ သန်းကျော် ပေးရသည်။

သစ်သီးဆိုင်မှ ဝန်ထမ်းအဘိုးအို ရှားအလမ်သည် ဘင်္ဂလားဒေ့ရှ်နိုင်ငံမှ လာရောက်အလုပ်လုပ်ကိုင်သူဖြစ်ပြီး မျက်စိအလွန်မှုန်ကာ အင်္ဂလိပ်စကား ထမင်းစားရေသောက်မျှသာ ပြောတတ်သည်။

နယူးယောက်တိုင်းမ်သတင်းစာကြီးမှ သတင်းထောက်တစ်ဦးက အဘိုးအိုရှားအလမ်ကို ငှက်ပျောသီးလေလံပွဲ အကြောင်းပြောပြလိုက်ရာ မိမိထံမှ ၂၅ ပြားဖြင့် ဝယ်သွားသော ငှက်ပျောသီးမှာ ကြောက်ခမန်းလိလိ ဈေးနှုန်းဖြင့် ပြန်လည်ရောင်းထွက်သွားမှုအပေါ် အဘိုးအို ရှားအလမ် နားမလည်နိုင်ခဲ့။

ထိုသတင်းကို ကြားရချိန်တွင် အဘိုးအိုမှာ မျက်ရည်ဖြိုင်ဖြိုင်ကျခဲ့ကြောင်း Sotheby’s ၏ ပြောရေးဆိုခွင့်ရ ပုဂ္ဂိုလ်က ပြောသည်။

“ကျွန်တော် ဆင်းရဲသားတစ်ယောက်ပါ။ ဒီလောက်များတဲ့ ငွေဆိုတာ ကျွန်တော် မြင်တောင် မမြင်ဖူးပါဘူး” ဟု အဘိုးအို ရှားအလမ်က နယူးယောက်တိုင်းမ် သတင်းထောက်အား ဘင်္ဂါလီစကားဖြင့် ကြေကွဲစွာ ပြောသည်။

(Installation artist ဖြစ်သူ Maurizio Cattelan သည် Sotheby’s ရုံးအပြင်ဘက်ရှိ လမ်းဘေးသစ်သီးဆိုင်တွင် တစ်နာရီလျှင် ၁၂ ဒေါ်လာဖြင့် အလုပ်လုပ်ရသော အဘိုးအိုထံမှ ငှက်ပျောသီးတစ်လုံး ဝယ်ယူခဲ့သည်။ ဓာတ်ပုံ-Reuters)

(Maurizio က ငှက်ပျောသီးအား မိုးကာတိပ်ဖြင့် ကပ်ထားသည့် installation လက်ရာကို Comedian ဟု အမည်ပေးခဲ့သည်။ ဓာတ်ပုံ-Reuters)

အဘိုးအို ရှားအလမ်သည် ဘင်္ဂလားဒေ့ရှ်နိုင်ငံ၊ဒါကာမြို့မှ လာခဲ့သူဖြစ်ပြီး ယခင်က အစိုးရဝန်ထမ်းတစ်ဦး ဖြစ်သည်။

နယူးယောက်မြို့၊ Long Island တွင်ရှိနေသော သမီးနှင့် နီးကပ်စွာနေနိုင်ရန် ၂၀၀၇ တွင် အမေရိကန်သို့ လိုက်လာခဲ့ခြင်း ဖြစ်သည်။

ဂျပ်စတင် ဆွန်းက အဘိုးအို ရှားအလမ်၏အကြောင်း သတင်းများတွင် သိရှိလာပြီးနောက်ပိုင်း အဘိုးအို၏ ဆိုင်မှ ငှက်ပျောသီး အလုံးရေ ၁၀၀,၀၀၀ ဝယ်ယူအားပေးမည်ဟု ကတိပြုသည်။

သို့သော် ငှက်ပျောသီးအလုံးရေ ၁၀၀,၀၀၀ ကို လမ်းဘေးဆိုင်လေးသို့ သယ်ယူရန်မှာ မလွယ်လှ။

သေတ္တာပေါင်း အလုံး ၁၀၀ စာ ရှိသည်။

(တရုတ်လူမျိုး crypto ငွေကြေးစီးပွားရေးလုပ်ငန်းရှင် Justin Sun မှ အဆိုပါ ငှက်ပျောသီးတစ်လုံးကို တိပ်ဖြင့်ကပ်ထားသော အနုပညာလက်ရာကို ဒေါ်လာ ၆.၂သန်းဖြင့် လေလံအောင်ခဲ့သည်။ ဓာတ်ပုံ- Courtesy Sotheby's)

(အဆိုပါ ငှက်ပျောသီးအနုပညာလက်ရာကို ကြမ်းခင်းဈေး ဒေါ်လာ ၁.၅ သန်းမျှဖြင့် လေလံစဖွင့်ခဲ့သော်လည်း ဈေးပြိုင်ပေးသူမျာကြား လေလံဈေးတိုးမြင့်လာခဲ့သည်။ ဓာတ်ပုံ- Nancy Kaszerman/ZUMA / SplashNews.com)

(Justin Sun သည် နယူးယောက်မြို့ရှိ Alam ၏သစ်သီးဆိုင်မှ ငှက်ပျောသီးပေါင်း တစ်သိန်း ကိုဝယ်ယူပြီး ကမ္ဘာအနှံ့ဖြန့်ဝေရန်စီစဉ်နေသည်။ ဓာတ်ပုံ- AFP via Getty Images)

ငှက်ပျောသီး အလုံး ၁၀၀,၀၀၀ ရောင်းချရမည်ဆိုပါက အမြတ်မှာ ဒေါ်လာ ၆၀၀၀ ခန့်ရှိသည်။

သို့သော် ဂျပ်စတင်ဆွန်း ဝယ်ယူအားပေးမည့် အမြတ်အစွန်းများမှာ ဆိုင်ပိုင်ရှင်သာ ရမည်ဖြစ်ပြီး ရှားအလမ်မှာ တစ်နာရီ ၁၂ ဒေါ်လာဖြင့် အလုပ်လုပ်ရသည့်အလုပ်သမားသာဖြစ်သောကြောင့် ရှားအလမ်ရရှိမည် မဟုတ်ချေ။

ရှားအလမ်၏ ဆိုင်ရှင်ဖြစ်သူ မိုဟာမက် အာရ် အစ္စလမ်ထံ သတင်းဌာနက ဖုန်းဖြင့် ဆက်သွယ်မေးမြန်းရာတွင် ဂျပ်စတင်ဆွန်း ဝယ်ယူအားပေးမည့် ငှက်ပျောသီးများ၏ အမြတ်အစွန်းများကို ရှားအလမ်နှင့် မိမိ၏ သစ်သီးဆိုင် ၂ ခုမှ အလုပ်သမား ၆ ဦးကို ခွဲဝေပေးမည်ဖြစ်ကြောင်း ဖြေကြားသည်။

သို့သော် ယနေ့အထိ မိမိထံ ထိုမျှများပြားသည့်ပမာဏ ဝယ်ယူမည်ဟု ဆက်သွယ်လာသူတစ်ဦးမှ မရှိသေးကြောင်းလည်း ဆိုင်ရှင်က ပြောသည်။

ဂျပ်စတင်ဆွန်းက သူ၏ X လူမှုကွန်ရက်အကောင့်တွင် ရေးသားထားသည်မှာ ရှားအလမ်ထံမှ ငှက်ပျောသီးများ ဝယ်ယူပြီးလျှင် ကမ္ဘာတစ်ဝန်းမှ ငှက်ပျောသီးစားလိုသူများထံ ဖြန့်ဝေပေးပို့သွားမည်ဟု ဆိုသည်။

(လေလံပွဲကို ဒေါ်လာ ၈သိန်းဖြင့် လေလံစဖွင့်ခဲ့သည်။ ဓာတ်ပုံ- Courtesy Sotheby's)

(၃၅ ဆင့်ဖြင့် သူရောင်းချခဲ့သောငှက်ပျောသီးမှာ ဒေါ်လာ ၆.၂ သန်းဖြင့်လေလံဆွဲအောင်ခဲ့ကြောင်းသိရသည့်အခါ Alam တစ်ယောက် ပြောစရာစကားပျောက်ဆုံးခဲ့ရသည်။ ဓာတ်ပုံ- Google Maps)

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: NYC fruit vendor, 74, who sold banana devastated after it became viral $6.2M artwork: ‘I am a poor man’ (nypost)

Photo Credit- AFP via Getty Images, Reuters