မလေးရှားနိုင်ငံ၏ စတုတ္ထမြောက် အချမ်းသာဆုံးဘီလျံနာကြီး အာနန္ဒ ကရစ်ရှနန် ကွယ်လွန်၊ တစ်ဦးတည်းသော သားမှာ ထိုင်း-မြန်မာနယ်စပ်တွင် ကျောင်းထိုင်ဆရာတော်ဖြစ်နေ

မလေးရှား၏ အချမ်းသာဆုံးပုဂ္ဂိုလ်များတွင် ပါဝင်ပြီး အိမ်ခြံမြေ၊ တယ်လီကွန်ဆက်သွယ်ရေး၊ သတင်းမီဒီယာနှင့် ရေနံလုပ်ငန်းတို့ အပါအဝင် လုပ်ငန်းနယ်ပယ်များစွာ လုပ်ကိုင်လျက်ရှိသူ ဘီလျံနာသူဌေးကြီး အာနန္ဒ ကရှစ်ရှနန် နိုဝင်ဘာ ၂၈ ရက်က ကွယ်လွန်သွားပြီး ကွယ်လွန်ချိန်တွင် အသက် ၈၆ နှစ်ရှိပြီ ဖြစ်သည်။

အာနန္ဒ ကရစ်ရှနန်သည် ငြိမ်းချမ်းစွာ ကွယ်လွန်သွားကြောင်း သူ၏ ရင်းနှီးမြှုပ်နှံမှုကုမ္ပဏီ Usaha Tegas က ထုတ်ပြန်ပြီး သူ၏မိသားစုက privacy ထားရန် တောင်းဆိုကြောင်းလည်း ဖော်ပြထားသည်။

ကွယ်လွန်ရခြင်းအကြောင်းရင်းကိုမူ ဖော်ပြထားခြင်း မရှိချေ။

“အာနန္ဒသည် တိုင်းပြည်တည်ထောင်ရေးနှင့် စီးပွားရေးလောကအတွက် ကြီးမားသည့်ကြိုးပမ်းမှုများ ဆောင်ရွက်ပေးခဲ့သည်။ သူ၏ ပရဟိတ လုပ်ဆောင်မှုများမှာ လူပေါင်းများစွာ၏ ဘဝများအပေါ် သက်ရောက်မှုများ ရှိခဲ့သည်” ဟု ကုမ္ပဏီ၏ ထုတ်ပြန်ချက်တွင် ဖော်ပြသည်။

အာနန္ဒ၏ ကြွယ်ဝမှုမှာ ရင်းဂစ် ၂၂ ဒသမ ၆ ဘီလီယံ (ကန်ဒေါ်လာ ၅ ဒသမ ၁ ဘီလီယံ) ရှိကြောင်း Forbes မဂ္ဂဇင်းကြီးက ဖော်ပြသည်။

((အာနန္ဒ ကရစ်ရှနန် ဘယ်သူလဲ))

အာနန္ဒ ကရစ်ရှနန်ကို မလေးရှားစီးပွားရေးလောကတွင် အေကေဟု လူသိများသည်။

အာနန္ဒ ကရစ်ရှနန်ကို ၁၉၃၈ ခုနှစ်၊ ဧပြီလ ၁ ရက်တွင် ကွာလာလမ်ပူမြို့၊ Brickfields အရပ်တွင် မွေးဖွားသည်။

မိဘမျိုးရိုးဇာစ်မြစ်မှာ သီရိလင်္ကာမှ ဖြစ်သည်။

ကရစ်ရှနန်သည် ကွာလာလမ်ပူမြို့၊ Victoria Institution အထက်တန်းကျောင်းတွင် တက်ခဲ့သည်။

ထို့နောက် သြစတေးလျနိုင်ငံ၊ မဲလ်ဘုန်းတက္ကသိုလ်တွင် တက်ရောက်ကာ နိုင်ငံရေးသိပ္ပံဖြင့် ကျောင်းပြီးခဲ့သည်။

ကရစ်ရှနန်သည် ဟားဘတ်တက္ကသိုလ်မှလည်း MBA ဘွဲ့ရရှိထားသေးသည်။ ကရစ်ရှနန်သည် ရေနံလုပ်ငန်းနယ်သို့ ဦးစွာဝင်ရောက်ခဲ့ပြီးနောက် အခြားလုပ်ငန်းနယ်ပယ်များသို့ ဆက်လက်ဝင်ရောက်ခဲ့သည်။

တယ်လီကွန်ဆက်သွယ်ရေးကုမ္ပဏီ Maxis ၊ မီဒီယာကုမ္ပဏီ Astro ၊ ဂြိုဟ်တုဝန်ဆောင်မှုကုမ္ပဏီ Measat တို့အပြင် အခြားကုမ္ပဏီများစွာတွင် ရှယ်ယာများ ပိုင်ဆိုင်ထားသည်။

အာနန္ဒ ကရစ်ရှနန် ချမ်းသာလာသည်မှာ ၁၉၈၀ နှင့် ၁၉၉၀ ပြည့်လွန်ကာလများအတွင်းဖြစ်ပြီး မလေးရှား ဝန်ကြီးချုပ် မဟာသီ မိုဟာမက်နှင့် နီးကပ်သော ဆက်ဆံရေးရှိခဲ့သည်။

ကရစ်ရှနန်သည် နိုင်ငံပိုင် ရေနံကုမ္ပဏီ Petronas ကို တည်ထောင်ခဲ့သည့် ဒါရိုက်တာတစ်ဦးဖြစ်သည်။

Bernama သတင်းဌာနက ဖော်ပြသည်မှာ ကရစ်ရှနန်သည် ၈၈ ထပ်မြင့်မားသော Petronas Twin Tower ဆောက်လုပ်ရန် အကြံဉာဏ်ကို မဟာသီထံ ရောင်းချခဲ့သည်ဟု ဆိုသည်။

အဆိုပါ တာဝါကြီးများ ဆောက်လုပ်ရာတွင်လည်း မဟာသီက ကရစ်ရှနန်ကို ဦးစီးစေခဲ့သည်။

အာနန္ဒ ကရစ်ရှနန်သည် ပညာရေး၊ အနုပညာနှင့် အားကစားနှင့် လူသားချင်းစာနာမှုဆိုင်ရာ ကဏ္ဍများတွင် လှူဒါန်းမှုများ ပြုလုပ်ခဲ့သည်။

ကရစ်ရှနန်သည် မလေးရှားနှင့် ပြင်သစ်တို့တွင် တလှည့်စီနေထိုင်သည်။

သူ၏ တစ်ဦးတည်းသောသားမှာ ငယ်စဉ်ကတည်းက ထိုင်းနိုင်ငံသို့သွားကာ ဗုဒ္ဓဘာသာရဟန်းတော် ဘဝခံယူခဲ့ပြီး ယနေ့အခါတွင် ထိုင်း-မြန်မာနယ်စပ်တွင် ကျောင်းထိုင်ဆရာတော်ဖြစ်နေသည်။

သမီးနှစ်ဦးရှိသော်လည်း ဖခင်၏ စီးပွားရေးလုပ်ငန်းများတွင် ပါဝင်ပတ်သက်လုပ်ကိုင်ခြင်း မရှိချေ။

အာနန္ဒ ကရစ်ရှနန် ကွယ်လွန်မှုနှင့် စပ်လျဉ်းပြီး လက်ရှိ မလေးရှားဝန်ကြီးချုပ် အန်ဝါ အီဘရာဟင်က ပြောသည်မှာ ကရစ်ရှနန်၏ စီးပွားရေးလောက၊ ပရဟိတနယ်ပယ်နှင့် လူ့အသိုက်အဝန်းအတွက် ကြိုးပမ်းခဲ့မှုများကို အမှတ်ရမည်ဖြစ်ကြောင်း ပြောသည်။

(ဆက်စပ်သတင်း)

မလေးရှားနိုင်ငံ တတိယအချမ်းသာဆုံးပုဂ္ဂိုလ်၏သား၊ အိမ်ခြံမြေအပါအဝင် ကုမ္ပဏီများစွာနှင့် ဒေါ်လာ ၅ ဘီလီယံအမွေကို စွန့်လွှတ်ကာ ဗုဒ္ဓဘာသာဝင် ရဟန်းဘဝခံယူခဲ့သူ အရှင်သီရိပန်ယို

https://www.imyanmarhouse.com/news/read/1076013

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Anand Krishnan, richest man in Malaysia, whose son gave up Rs 55000 crore fortune to become monk, dies, his business was… (apnews)