တချိန်က ဂျာမနီသို့သွားကာ အင်ဂျင်နီယာအဖြစ် လုပ်ကိုင်ခဲ့သော အမျိုးသားမှာ ချစ်သူနှင့် လမ်းခွဲရ သောကြောင့် အရက်ဂျိုးဖြစ်ကာ ယခုအခါ အိန္ဒိယနိုင်ငံ၊ ဘင်္ဂလိုမြို့တွင် တောင်းရမ်းစားသောက် နေရသည့် သင်ခန်းစာရဖွယ် ဖြစ်ရပ်

အင်တာနက်အွန်လိုင်းတွင် အိန္ဒိယနိုင်ငံ၊ ဘင်္ဂလူရူ (ဘင်္ဂလိုဟုလည်းခေါ်) မြို့မှ အမျိုးသားတစ်ဦးအကြောင်း ဗွီဒီယိုဖိုင်များစွာ ပျံ့နှံ့နေသည်။

ထိုသူမှာ ပညာတတ်တစ်ဦးဖြစ်ပြီး ဂျာမနီနိုင်ငံ၊ ဖရန့်ဖတ်မြို့တွင် သွားရောက် အလုပ်လုပ်ကိုင်ခဲ့ဖူးသည်။

နောက်ပိုင်းတွင် ဘင်္ဂလိုမြို့ရှိ ထိပ်တန်းနည်းပညာကုမ္ပဏီတစ်ခုတွင် လုပ်ကိုင်ခဲ့သည်။

ယခုအခါ ထိုအမျိုးသားမှာ ဘင်္ဂလိုမြို့၊ Jayanagar အရပ်ရှိ လမ်းများပေါ်တွင် လိုက်လံတောင်းရမ်း စားသောက်နေသည့် ဗွီဒီယိုဖိုင်များမှာ လူမှုကွန်ရက်တွင် ဂယက်ရိုက် ပျံ့နှံ့လျက် ရှိနေသည်။

အနီရောင် တီရှပ်ဝတ်ဆင်ထားပြီး ဖရိုဖရဲ ဖိုသီဖတ်သီဖြစ်နေသည်ကို အတိုင်းသား တွေ့ရသည်။

အင်စတာဂရမ်လူမှုကွန်ရက်တွင် Sharath Yuvaraj အမည်ရှိ အကောင့်က တင်ခဲ့သော ဗွီဒီယိုဖိုင်ထဲ၌ ထိုအမျိုးသားက သူ၏ ဘဝဇာတ်ကြောင်းကို ပြောပြထားသည်။

၎င်း၏ ပြောပြချက်အရ မိဘနှစ်ပါးနှင့် ချစ်သူကို ဆုံးရှုံးလိုက်ရခြင်းကြောင့် မိမိမှာ အရက်သမားလုံးလုံး ဖြစ်သွားခဲ့ကြောင်း၊ နောက်ပိုင်းတွင် အရက်က လူကို ပြန်သောက်သည့် အခြေအနေရောက်ခဲ့ရာ အိမ်ရာမဲ့ဖြစ်သွားပြီး အသက်ရှင်ရေးအတွက် လမ်းပေါ်တွင် တောင်းရမ်းစားသောက်ရသည့်ဘဝသို့ ရောက်ခဲ့ရသည်ဟု ဆိုသည်။

Sharath က ထိုအမျိုးသားကို ပညာရေးအခြေအနေမေးမြန်းရာ “ကျွန်တော် အင်ဂျင်နီယာတစ်ယောက်ပါ။ Global Village မှာရှိတဲ့ Mindtree မှာ အလုပ်လုပ်ခဲ့ပါတယ်။ မိဘတွေ ဆုံးရှုံးသွားတဲ့အချိန်မှာ ကျွန်တော် ယမကာလုလင်ဖြစ်သွားတယ် ဆရာ” ဟု ဖြေသည်။

ထိုအမျိုးသားက တရားထိုင်ခြင်း၊ ဒဿနိကဗေဒနှင့် သိပ္ပံပညာရပ်အကြောင်းများ ပြောပြခဲ့ပြီး အဲလ်ဘတ် အိုင်စတိုင်းနှင့် စကော့တလန် အတွေးအခေါ်ပညာရှင် David Hume တို့ကိုပင် ကိုးကား ပြောပြသွားသေးသည်။

Sharath သည် ထိုအမျိုးသားနှင့် ၃ ကြိမ် ဆုံစည်းခဲ့ပြီး အင်စတာဂရမ်တွင် ဗွီဒီယိုဖိုင် ၃ ခု တင်ခဲ့သည်။

Sharath သည် Jayanagar ရှိ JSS College လမ်းတွင် ထိုအမျိုးသားနှင့် ပထမဆုံး ဆုံစည်းခဲ့ခြင်းဖြစ်သည်။

Sharath က အကူအညီပေးမည်ဟု ကမ်းလှမ်းခဲ့သော်လည်း ထိုအမျိုးသားက မည်သည့်အကူအညီမှ လက်မခံခဲ့ချေ။

နောက်ပိုင်း လူမှုကွန်ရက်ပို့စ်များတွင် Sharath က ပြောပြသည်မှာ မိမိအနေဖြင့် NGOs အဖွဲ့အစည်းများထံ ဆက်သွယ်ခဲ့ကြောင်း၊ သို့သော် ထိုအမျိုးသား၏ အခြေအနေကို ဝင်ရောက်စွက်ဖက်ရန်မှာ ရဲတပ်ဖွဲ့၏ အကူအညီဖြင့်သာ ဖြစ်နိုင်ဟု ဆရာဝန်တစ်ဦးက ပြောပြကြောင်း ရေးသားထားသည်။

နောက်ဆုံးဗွီဒီယိုထဲတွင် ထိုအမျိုးသားက ပြောသည်မှာ “ဘာသာရေး၊ ဇာတ်နိမ့်ဇာတ်မြင့်ခွဲခြားမှု ဒါတွေ အားလုံးဟာ…ကျွန်တော်ဘယ်လိုဘဝရောက်နေလဲသာ ကြည့်ပါ။ ကျွန်တော်စာတွေ ဖတ်ဖို့ လိုပါသေးတယ်” ဟု ပြောသည်။

Sharath က အင်စတာဂရမ်တွင် Story ၌ ရေးသားခဲ့သည်မှာ “အခုကျွန်တော်တို့ အဲဒီအမျိုးသားကို Jayanagar ဝန်းကျင်မှာ နေ့တိုင်းလိုက်ရှာနေပါတယ်။ အခုထိ ရှာမတွေ့ပါဘူး။ ကျွန်တော်တို့ ဘင်္ဂလိုမြို့ အကြီးအကဲ၊ Jayanagar ရဲတပ်ဖွဲ့အကြီးအကဲတွေနဲ့ တွေ့ပါမယ်။ သူတို့ရဲ့ အကူအညီနဲ့ ဒီအမျိုးသားကို ရှာပါမယ်။ သူ့ကို ခြေရာခံနိုင်ဖို့က ကျွန်တော်တို့ရဲ့ ပထမဆုံးအလုပ်ပါပဲ” ဟု ဖော်ပြသည်။

Sharath တင်ခဲ့သော ဗွီဒီယိုဖိုင်များတွင် ဝင်ရောက်မှတ်ချက်ပြုသူ များပြားခဲ့ပြီး ထိုအမျိုးသားအတွက် ဝမ်းနည်းကြောင်း မှတ်ချက်ပြုကြသည်။

ထို့အပြင် အရက်သေစာ သောက်စားခြင်းသည် အောင်မြင်နေသော ဘဝတစ်ခုကို ကျရှုံးစေနိုင်ကြောင်း သာဓကတစ်ခုဖြစ်သည်ဟု မှတ်ချက်ပြုကြသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Once a techie in Frankfurt, now begging in Bengaluru: Man shares story in viral videos (indiatoday) Photo Credit-Instagram