ရုရှားသမ္မတ ဗလာဒီမာ ပူတင်၏ မိတ်ဆွေ ရုရှားဘီလျံနာကြီးက အမေရိကန်ရှိ အိမ်ခြံမြေများကို ဆက်တိုက် ရောင်းထုတ်နေရာ ယခုအခါ နယူးယောက်ရှိ ရွှေချထားသော Penthouse ခန်းကို ရောင်းထုတ်လာပြန်၊ ငွေသားချည်းသက်သက်ဖြင့် ရောင်းချခြင်းဖြစ်

ရုရှားသမ္မတ ဗလာဒီမာပူတင်၏ မိတ်ဆွေ ဘီလျံနာသူဌေးကြီး ဗယ်လရီ ကိုဂန် (Valery Kogan) သည် နယူးယောက်မြို့၊ Central Park West လမ်း၊ အမှတ် ၁၅ တွင် တည်ရှိသော အဆောက်အအုံကြီးရှိ ရွှေချထားသော Penthouse ခန်းကို ရောင်းချရန် သဘောတူစာချုပ်ချုပ်ဆိုလိုက်ပြီဖြစ်ကြောင်း StreetEasy က ဖော်ပြသည်။

ဗယ်လရီနှင့် ဇနီးဖြစ်သူ အော်လ်ဂါတို့သည် မော်စကိုမြို့ရှိ Domodedovo လေဆိပ်ကို ပူးတွဲပိုင်ဆိုင်ကြသူများလည်း ဖြစ်သည်။

နယူးယောက်ပို့စ်သတင်းဌာနမှ Gimme Shelter ထံ သတင်းရင်းမြစ်တို့၏ ပြောကြားချက်များအရ ငွေသားချည်းသက်သက်ဖြင့် အရောင်းအဝယ်ပြုလုပ်ခဲ့ခြင်း ဖြစ်သည်ဟု ဆိုသည်။

အဆိုပါ penthouse ခန်းသည် ပြီးခဲ့သောနှစ်ကတည်းက အရောင်းဈေးကွက်ဝင်ခဲ့ခြင်းဖြစ်ပြီး ထိုစဉ်က ကန်ဒေါ်လာ ၆၅ သန်း ဈေးခေါ်ခဲ့သည်။

နောက်ဆုံးခေါ်ဈေးမှာ ကန်ဒေါ်လာ ၃၉ သန်း ဖြစ်သည်။

သတင်းများအရ ဝယ်ယူသွားသူမှာ နယူးယောက်မြို့ခံ သက်ကြီးပိုင်းတစ်ဦးဖြစ်သည်ဟု ဆိုသည်။

ဗယ်လရီ ကိုဂန်တို့ ဇနီးမောင်နှံသည် ရုရှားက ယူကရိန်းကို ၂၀၂၂ ခုနှစ်တွင် ကျူးကျော်တိုက်ခိုက်မှု စတင်ခဲ့ပြီးနောက်ပိုင်းကတည်းက အမေရိကန်ရှိ အိမ်ခြံမြေများကို ရောင်းထုတ်လျက်ရှိရာ ယခု penthouse ခန်း ရောင်းချမှုမှာ နောက်ဆုံးရောင်းချမှုလည်း ဖြစ်သည်။

(ဗယ်လရီ ကိုဂန်)

(penthouse ခန်း၏ အကျယ်အဝန်းမှာ စတုရန်းပေ ၅၃၉၈ ရှိသည်။ ဓာတ်ပုံ- Edward Menashy of Evan Joseph Photography for Douglas Elliman)

(ကျောက်မျက်ရတနာများ၏ အရောင်အသွေးကဲ့သို့ မွမ်းမံထားသည်။ ဓာတ်ပုံ- Edward Menashy of Evan Joseph Photography for Douglas Elliman)

ကိုဂန်တို့စုံတွဲသည် အမေရိကန်ပြည်၊ ကွန်နက်တီကပ်ပြည်နယ်၊ ဂရင်းဝစ်ချ်မြို့ရှိ ၇ ဧကကျယ်သော ခြံဝန်းကို ကန်ဒေါ်လာ ၁၀ ဒသမ ၄ သန်းဖြင့် ရောင်းထုတ်ထားသည်။

အဆိုပါခြံကို မူလက ကန်ဒေါ်လာ ၁၄ ဒသမ ၅ သန်းဈေးခေါ်ခဲ့ခြင်း ဖြစ်သည်။

ထို့အပြင် အစ္စရေးနိုင်ငံ၊ တဲလ်အဗစ်မြို့ရှိ penthouse ခန်းတစ်ခုကိုလည်း ကန်ဒေါ်လာ ၃၃ သန်းဖြင့် မကြာသေးမီက ရောင်းထုတ်ထားသေးသည်။

ပြီးခဲ့သောနှစ်အတွင်းကလည်း ကိုဂန်တို့ ဇနီးမောင်နှံသည် နယူးယောက်မြို့၊ ပန်းခြံရိပ်သာလမ်း၊ အမှတ် ၅၁၅ ရှိ ကွန်ဒိုခန်းကို ကန်ဒေါ်လာ ၁၄ ဒသမ ၅ သန်းဖြင့် ရောင်းထုတ်ခဲ့သည်။

ထိုအခန်းကို ၂၀၂၀ ပြည့်နှစ်အတွင်း စတင်အရောင်းဈေးကွက်တင်ခဲ့ပြီး ထိုစဉ်က ကန်ဒေါ်လာ ၂၅ သန်းအထိ ဈေးခေါ်ခဲ့သည်။

(နံရံနှင့် မျက်နှာကြက်တွင် မွမ်းမံထားသည်များကို အသေအချာ လေ့လာကြည့်ပါ။ ဓာတ်ပုံ- Edward Menashy of Evan Joseph Photography for Douglas Elliman)

ကိုဂန်တို့ဇနီးမောင်နှံသည် နယူးယောက်မြို့၊ Plaza Hotel ရှိ လူနေခန်းကိုလည်း ကန်ဒေါ်လာ ၂၅ သန်းဈေးခေါ်ကာ ရောင်းထုတ်ရန် စီစဉ်ထားရာ ယနေ့တိုင်အရောင်းဈေးကွက်တွင် ရှိနေဆဲ ဖြစ်သည်။

ကိုဗစ်မတိုင်မီက အဆိုပါအခန်းကို ဒေါ်လာ သန်း ၅၀ အထိ ဈေးခေါ်ခဲ့သည်။

ကိုဂန်တို့ ဇနီးမောင်နှံသည် ငွေသုံးကြမ်းမှုဖြင့်လည်း နာမည်ကြီးသည်။ ၂၀၁၃ ခုနှစ်အတွင်းက မြေးမလေး မင်္ဂလာဆောင်တွင် ဖျော်ဖြေပေးရန်အတွက် မရိုင်ယာ ကယ်ရေးနှင့် အယ်လ်တန်ဂျွန်တို့ကို ဒေါ်လာ သန်းပေါင်းများစွာပေးကာ ငှားရမ်းခဲ့သည်။

(Penthouse ခန်း၏ အတွင်းပိုင်းမြင်ကွင်းတစ်ခု။ ဓာတ်ပုံ- Edward Menashy of Evan Joseph Photography for Douglas Elliman)

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Russian oligarch poised to sell gilded NYC penthouse in an all-cash deal — amid a massive global property sell-off (nypost) Photo Credit- Edward Menashy of Evan Joseph Photography for Douglas Elliman

Photo Credit - Some Valery Kogan images