ပြည်ပ အိမ်ခြံမြေ သတင်း | Posted by စည်သူအောင်
ဆော်ဒီအာရေးဘီးယားနိုင်ငံတွင် ကမ္ဘာ့အကြီးမားဆုံး အဆောက်အအုံကြီး ဆောက်လုပ်မှု တရားဝင် စတင်လိုက်ပြီ ဖြစ်သည်။
ဆော်ဒီအာရေးဘီးယား၏မြို့တော် ရီယာ့ဒ်တွင် တည်ရှိပြီး Mukaab ဟု အမည်ပေးထားသည့် အဆောက်အအုံကြီးကို ကန်ဒေါ်လာ ၅၀ ဘီလီယံအထိ အကုန်အကျခံ ဆောက်လုပ်သွားမည်ဖြစ်သည်။
ဆော်ဒီအာရေးဘီးယားနိုင်ငံတဝန်းတွင် အနာဂတ်ဆန်လှသော ဆောက်လုပ်ရေးစီမံကိန်း များစွာ အကောင်အထည်ဖော်နေရာ Mukaab လည်း အပါအဝင် ဖြစ်သည်။
(ဒေါ်လာ ၅၀ ဘီလီယံကုန်ကျမည့် Mukaab အဆောက်အအုံကြီး၏ သရုပ်ဖော်ဓာတ်ပုံ။ ဓာတ်ပုံ-flickr/ Salman Al-Mazini)
ရီယာ့ဒ်၏ ကောင်းကင်မြင်ကွင်းကို ပြောင်းလဲစေမည့် Mukaab အဆောက်အအုံကြီးသည် အမြင့်ပေ ၁၃၀၀၊ အကျယ် ပေ ၁၂၀၀ ရှိမည်ဖြစ်ရာ အမေရိကန်ပြည်ထောင်စုမှ Empire State အဆောက်အအုံကြီး အလုံး ၂၀ စာ အရွယ်အစားရှိသည်။
Mukaab အဆောက်အအုံကြီးတွင် ရုံးခန်းများ၊ လက်လီအရောင်းဆိုင်နေရာများ၊ စားသောက်ဆိုင်များ ပါဝင်မည်ဖြစ်ပြီး ကြမ်းခင်း စတုရန်းပေ ၂ သန်းရှိမည်ဟု ဆိုသည်။
Mukaab အဆောက်အအုံကြီးတွင် လူပေါင်းများစွာလည်း အခြေချနေထိုင်နိုင်မည်ဖြစ်ပြီး လူနေခန်းပေါင်း ၁၀၄၀၀၀ အထိ ပါဝင်မည်ဖြစ်သည့်အပြင် ဟိုတယ်ခန်းပေါင်း ၉၀၀၀ ပါဝင်မည်ဟု ဆိုသည်။
အဆောက်အအုံတွင်းရှိ မည်သည့်နေရာမှမဆို ၁၅ မိနစ်အတွင်း ရောက်နိုင်မည့် စိမ်းလန်းစိုပြေသော နေရာများလည်း ဖန်တီးပေးမည်ဖြစ်ကြောင်း developer က ပြောသည်။
Mukaab သို့ လာရောက်လည်ပတ်သူများအား ပျော်ဝင်စီးမျောနိုင်မည့် အတွေ့အကြုံမျိုးရစေရန် ဆောက်လုပ်မည့် Developer ဖြစ်သော The New Murabba Development ကုမ္ပဏီက AI နည်းပညာကို အသုံးပြုသွားမည်ဟု ဆိုသည်။
ထိုသို့သောအရာမျိုးတွင် Las Vegas Sphere ၏ စတိုင်မျိုးဖြစ်သော ကြီးမားလှသည့် screen ကြီးများလည်း ပါဝင်မည် ဖြစ်သည်။
ယခုစီမံကိန်းဖြင့် ဆော်ဒီအာရေးဘီးယားကို ပိုမိုခေတ်မီသည့် အနာဂတ်ဆီသို့ ပို့ဆောင်ပေးရန် ရည်မှန်းထားသော်လည်း ဒေသဂေဟဗေဒ၊ ဒေသဗိသုကာတို့အပေါ်တွင်သာ အခြေခံသွားမည်ဖြစ်ကြောင်း အဆိုပါကုမ္ပဏီက ပြောကြားထားသည်။
(Mukaab အဆောက်အအုံကြီး၏ သရုပ်ပြ နမူနာပုံ။ ရှေ့မျက်နှာစာကို ကြီးမားသည့် screen ကြီးများဖြင့် ကာရံထားမည်ဖြစ်သည်။ ဓာတ်ပုံ-Public Investment Fund)
စတုရန်းပုံ ပုံဖော်ဆောက်လုပ်မည့် အဆောက်အအုံဒီဇိုင်းမှာ ဒေသတွင်း Najdi ဗိသုကာဟန်ဖြစ်သည်။
Najdi ဗိသုကာတွင် ရွှံ့အုတ်များကို အသုံးပြုပြီး တြိဂံပုံ (သို့မဟုတ်) ထောင့်မှန်စတုဂံပုံ ပြတင်းများ၊ တံခါးများ ပါဝင်ကာ အလယ်ဗဟိုတွင် ကွက်လပ်တစ်ခု ထားလေ့ရှိသည်။
Makaab သည် ရေနံမှ မဟုတ်သော GDP ကဏ္ဍတွင် ကန်ဒေါ်လာ ၅၁ ဘီလီယံဖြည့်တင်းပေးနိုင်မည်ဟု ခန့်မှန်းထားပြီး အလုပ်အကိုင်နေရာပေါင်း ၃၃၄၀၀၀ ခန့် ဖန်တီးပေးနိုင်မည်ဟု မျှော်မှန်းထားသည်။
1.jpg)
Makaab အဆောက်အအုံကြီးကို ဆောက်လုပ်ရေးလုပ်သားပေါင်း ၉၀၀ ခန့်ဖြင့် ဆောက်လုပ်မည်ဖြစ်ပြီး ၂၀၃၀ ပြည့်နှစ်တွင် အပြီးသတ်ဆောက်လုပ်ရန် ရည်မှန်းထားသည်။
အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။
ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
(iMyanmarHouse.com Team မှ ရေးသား ဖော်ပြသည်။)
Credit: iMyanmarHouse.com
Ref: Saudi Arabia breaks ground on $50B Mukaab, the ‘world’s largest building’ — which could hold 20 Empire State Buildings (nypost) Photo Credit- flickr/ Salman Al-Mazini, Public Investment Fund
