အိမ် ၃ လုံး၊ ကလေးအမေ ၃ ဦးနှင့် ကလေး ၁၁ ဦးအကြောင်း (သို့) Elon Musk က ၎င်း၏ ကလေး ၁၁ ဦးနှင့် ကလေးမိခင်တို့ နေထိုင်ရန် စံအိမ်ဝန်းကြီးတစ်ခု ဆောက်လုပ်ရေးအတွက် အော်စတင်မြို့တွင် အိမ်ခြံမြေများ ဝယ်ယူလျက်ရှိကြောင်း သတင်းများထွက်ပေါ်

အမေရိကန်ပြည်ထောင်စု၊ တက္ကဆပ်ပြည်နယ်၊ အော်စတင်မြို့ရှိ ဒေါ်လာ သန်းပေါင်းများစွာ တန်ကြေးရှိသော စံအိမ်များ စီတန်းတည်ရှိသည့် စိမ်းလန်းအုံ့မှိုင်းကာ ဆိတ်ငြိမ်သော လမ်းတစ်ခုတွင် စတုရန်းပေ ၁၄၄၀၀ ကျယ်ဝန်းသည့် စံအိမ်ကြီးတစ်လုံးရှိနေသည်။

ထိုစံအိမ်နေရာသည် အသက် ၅၃ နှစ်အရွယ် ကမ္ဘာ့အချမ်းသာဆုံးပုဂ္ဂိုလ် Elon Musk က အများနှင့်မတူ တမူထူးသည့် မိသားစုစံအိမ်ဝန်း တည်ထောင်ရန် ကြိုးစားနေသည့် နေရာဖြစ်ကြောင်း သူ၏ စီမံကိန်းကို သိရှိထားသူ ၄ ဦးက ပြောသည်ဟု နယူးယောက်တိုင်းမ် သတင်းစာကြီးက ဖော်ပြသည်။

Elon Musk က သူ၏ ကလေးများ (အနည်းဆုံး ၁၁ ဦးရှိ) နှင့် ၎င်းတို့၏ မိခင် ၃ ဦးအနက် ၂ ဦးတို့ အတူတကွ နီးကပ်စွာ နေထိုင်နိုင်ရန် မျှော်မှန်းထားကြောင်း ၎င်းနှင့် နီးစပ်သူတို့ကို မကြာသေးမီ လများအတွင်း ပြောပြခဲ့သည်။

ထိုသို့ နေထိုင်ခြင်းအားဖြင့် ကလေးငယ်များ အတူတကွ နီးကပ်စွာ နေထိုင်နိုင်မည့်အပြင် Elon Musk က ၎င်းတို့အတွက် အချိန်ပေးရန် ပိုမိုလွယ်ကူသွားမည် ဖြစ်သည်။

ထိုစံအိမ်၏ နောက်ဘက်တည့်တည့်ရှိ အိပ်ခန်း ၆ ခန်းပါ စံအိမ်ကြီးမှာလည်း Elon Musk ဝယ်ယူခဲ့သော စံအိမ်ဖြစ်ကြောင်း လူပုဂ္ဂိုလ် ၂ ဦး၏ ပြောပြချက်နှင့် အများပြည်သူတို့သိနိုင်သော အိမ်ခြံမြေမှတ်တမ်းများတွင် ဖော်ပြသည်။

ထိုစံအိမ်ကြီး ၂ လုံး၏ စုစုပေါင်းတန်ကြေးမှာ ကန်ဒေါ်လာ ၃၅ သန်းခန့် ရှိသည်။

ယခင်ကမူ Elon Musk က မည်သည့်အိမ်ခြံမြေမှ ကိုယ်ပိုင် ပိုင်ဆိုင်မှုထားမည်မဟုတ်ကြောင်းပြောကာ ၎င်းပိုင်သမျှ အိမ်ခြံမြေများအားလုံးကို ရောင်းထုတ်ခဲ့ဖူးသည်။

(ဆက်စပ်သတင်း)

နေအိမ်များ တစ်လုံးမကျန် ရောင်းထုတ်မည်ဟု ကြေညာထားသော ကမ္ဘာ့အချမ်းသာဆုံး သူဌေးကြီး Elon Musk က ကယ်လီဖိုးနီးယားရှိ နေအိမ် ၅ လုံးကို ကန်ဒေါ်လာ ၉၇ ဒသမ ၅ သန်းဖြင့် ထပ်မံ အရောင်းဈေးကွက်တင်

https://www.imyanmarhouse.com/news/read/919765

Elon Musk သည် အော်စတင်မြို့သို့ ရောက်သည့်အခါများတွင် ယခုစံအိမ်များမှ ခြေလျင် ၁၀ မိနစ်မျှ ဝေးကွာသော နေရာရှိ စံအိမ်တစ်လုံးတွင် နေထိုင်လေ့ရှိကြောင်း ယခုသတင်းရင်းမြစ်တို့က ပြောသည်။

စံအိမ် ၃ လုံး၊ ကလေး အမေ ၃ ဦး၊ ကလေး ၁၁ ဦး၊ ကမ္ဘာ့လူဦးရေကျဆင်းမှုအပေါ် စိုးရိမ်နေသော ဘီလျံနာသူဌေးကြီး။

ထိုမိသားစု ဖွဲ့စည်းမှုမှာ တမူထူးခြားနေပြီး Elon Musk က လူဦးရေ ပိုမိုတိုးပွားလာရန်ပင် ကြိုးစားလိုပုံ ရသည်။

သုတ်ပိုးလှူဒါန်းကာ ဖန်ပြွန်သန္ဓေယူစေခြင်းများမှာ ကမ္ဘာ့လူဦးရေ တိုးတက်စေရန် ကြီးမားစွာ အထောက်အကူ ပြုနိုင်ကြောင်း Elon Musk က ယုံကြည်သည်။

Elon Musk က သူ၏ သုတ်ပိုးကို မိတ်ဆွေများနှင့် အသိအကျွမ်းများအား လှူဒါန်းပေးရန် ကမ်းလှမ်းခဲ့ဖူးရာ ဒုတိယသမ္မတလောင်းအဖြစ် ဝင်ရောက်ယှဉ်ပြိုင်ခဲ့ဖူးသူ Nicole Shanahan လည်း ပါဝင်ကြောင်း၊ မစ္စ Shanahan က Elon Musk ၏ ကမ်းလှမ်းမှုကို ပယ်ချခဲ့ကြောင်း ထိုအကြောင်းရပ်ကို သိရှိထားသူ ၂ ဦးက နယူေးယာက်တိုင်းမ် သတင်းစာသို့ ပြောသည်။

Elon Musk သည် ပြီးခဲ့သော ၂ နှစ်တာအတွင်း ကမ္ဘာ့မွေးဖွားနှုန်းကျဆင်းနေမှုအပေါ် စိုးရိမ်မကင်းဖြစ်နေခဲ့သည်။

Elon Musk က ၎င်းဝယ်ယူထားသော X လူမှုကွန်ရက်မှတဆင့် တတ်နိုင်သမျှ ကလေးများများယူရန် တိုက်တွန်းခဲ့ဖူးသည်။

“ကလေးယူဖို့ကိစ္စက အမျိုးသားအဆင့် အရေးပေါ်အခြေအနေဖြစ်နေပါပြီ” ဟု Elon Musk က X လူမှုကွန်ရက်တွင် ယခုနှစ် ဇွန်လအတွင်း ရေးသားခဲ့သည်။

Elon Musk က အော်စတင်မြို့တွင် စံအိမ်များ ဝယ်ယူခဲ့မှုမှာ လျှို့ဝှက်ကိစ္စအနေဖြင့်သာ ရှိနေသည်။

တိုင်းမ်မဂ္ဂဇင်းကြီးက ဖော်ပြခဲ့သည်မှာ Elon Musk သည် အော်စတင်တွင် စတုရန်းပေ ၁၄၄၀၀ ရှိ Tuscan ဗိသုကာဟန် စံအိမ်ကြီးတစ်လုံး ပိုင်ဆိုင်ထားပြီး ထိုအိမ်၏ နောက်တည့်တည့်တွင်ရှိသာ အိပ်ခန်း ၆ ခန်းပါ စံအိမ်ကြီးကိုလည်း နောက်ကွယ်မှပံ့ပိုးကာ တိတ်တဆိတ် ဝယ်ယူထားကြောင်း ဖော်ပြသည်။

Elon Musk နှင့် ကလေးရခဲ့သူ အမျိုးသမီး ၃ ဦးအနက် လက်ရှိအားဖြင့် တစ်ဦးသာ အဆိုပါစံအိမ်များတွင် နေထိုင်လျက်ရှိသည်ဟု Times က ဖော်ပြသည်။

ထိုသို့ နေထိုက်လျက်ရှိသူတစ်ဦးမှာ Elon Musk ၏ ကုမ္ပဏီများအနက်တစ်ခုဖြစ်သော Neuralink ၏ အမှုဆောင်တစ်ဦးဖြစ်သူ Shivon Zilis ဖြစ်သည်။

 (Grimes ဟု လူသိများသူ ကနေဒါအဆိုတော် Claire Boucher နှင့် Elon Musk တို့နှစ်ဦးကို ၂၀၁၈ ခုနှစ်အတွင်း အတူတွေ့ရပုံ။ Elon Musk နှင့် Grimes တို့အကြား ကလေး ၃ ဦး အုပ်ထိန်းခွင့်နှင့် စပ်လျဉ်းပြီး အငြင်းပွားနေသည်။ ဓာတ်ပုံ-Damon Winter/ The New York Times)

 (Elon Musk သည် ကမ္ဘာ့ခေါင်းဆောင်များနည်းတူ ကမ္ဘာ့လူဦးရေကျဆင်းမှုကို စိုးရိမ်မကင်းဖြစ်နေသည်။ ဓာတ်ပုံ-Graham Dickie/ The New York Times)

 (Elon Musk က သူ၏လုပ်ငန်းများကို တက္ကဆပ်ပြည်နယ်သို့ ပြောင်းရွှေ့နေပြီး အော်စတင်မြို့တွင် မိသားစု နေအိမ်ဝန်းတစ်ခု တည်ထောင်နိုင်ရန် ကြိုးစားနေသည်။ ဓာတ်ပုံ-Jordan Vonderhaar for The New York Times)

 (Elon Musk က အဘယ်ကြောင့် ဤဒေသတွင် အိမ်ဝယ်ရန် ရွေးချယ်ရသည်ကို အိမ်နီးချင်းများ နားမလည်နိုင် ဖြစ်နေသည်။ ဓာတ်ပုံ- Jordan Vonderhaar for The New York Times)

((မှတ်ချက်။ Elon Musk ကမူ အော်စတင်မြို့၌ နေအိမ်များ ဝယ်ယူပိုင်ဆိုင်ထားခြင်းမရှိကြောင်း သူ၏ လူမှုကွန်ရက်အကောင့်မှတဆင့် ငြင်းဆိုထားသည်))

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767  သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Elon Musk wants big families. He Bought a secret compound for his. (New York Times) Photo Credit- Stephen Lam, Damon Winter/ The New York Times, Graham Dickie/ The New York Times, Jordan Vonderhaar for The New York Times)