အဆင့်မြင့်မြို့တော် စီမံကိန်း စက်တင်ဘာလတွင် ပြန်လည်စတင်မည်

စီမံကိန်း တာဝန်ရှိသူများမှ စာရင်းချုပ်လုပ်ငန်းများကို လုပ်ကိုင်နေသောကြောင့်အဆင့်မြင့်မြို့တော်
တည်ဆောက်ရေးလုပ်ငန်းနှင့်ပတ်သက်သည့် လုပ်ကိုင်မှုအား ခေတ္တရပ်ဆိုင်းထားရာမှ စက်တင်ဘာလ(၁၃)ရက်နေ့မှစတင်ကာစီမံကိန်းဧရိယာ
အတွင်းပါဝင်သည့် ကျေးရွာများ၏ လယ်မြေများအား လာရောက်အပ်နှံခြင်းနှင့်စတင်၍စီမံကိန်းကြီးအား ပြန်လည်စတင်တော့မည်ဖြစ်ကြောင်း အများနှင့်သက်ဆိုင်သော ကုမ္ပဏီဥက္ကဋ္ဌ၏ စကားကို ကိုးကား၍ ဒေသခံ ကိုမြတ်ဆွေက ပြောသည်။

“သူတို့တစ်တွေအနေနဲ့ စက်တင်ဘာလထဲမှာ ပြန်စလုပ်မယ်။ အားလုံးအဆင်ပြေသွားပါပြီး။ ကျွန်တော်တို့ ဒေသခံတွေ အနေနဲ့ကလည်း ဒီစီမံကိန်းကြီး ဖြစ်မြောက်ဖို့အတွက်ပဲ ရှိတာပါ။ ဘာလို့လဲဆိုတော့ ဒီစီမံကိန်းကြီးက ကျွန်တော်တို့ ဒေသခံတွေရဲ့ဘ၀ကို မြင့်မားစေနိုင်တဲ့
အတွက်ပါ။

အခုပြန်အပ်ဖို့ကျန်တဲ့လယ်ယာတွေကိုလည်း ဒေသခံတွေအများစုအပ်ကြမှာပါ”ဟု ကိုမြတ်ဆွေက ပြောသည်။
အဆိုပါ တံတားဦးအဆင့်မြင့်မြို့တော် စီမံကိန်းကြီးအား ကတို့ဆိပ်ကျေးရွာ အုပ်စု၊ ခေါင်းကွဲကျေးရွာ အုပ်စု၊ လက်ဆောင်ယူ ကျေးရွာအုပ်စုနှင့် ငါးရာပြ ကျေးရွာအုပ်စုဟူ၍ ကျေးရွာအုပ်စု လေးအုပ်စု အတွင်းရှိ ဧက (၂၂၀၀) အတွက် တစ်ဧကလျှင် သိန်း (၁၀၀) နှုန်းဖြင့်နစ်နာကြေး ပေးချေထားပြီး သုံးဧက အပ်နှံပါက စီမံကိန်းကြီးဧရိယာအတွင်းတွင် ပေ (၄၀) ပေ (၆၀) အကွက်တစ်ကွက် ထပ်မံရရှိမည့် စနစ်ဖြင့် ပေးချေမှု ပြုလုပ်ခဲ့သည်။

ယခု စက်တင်ဘာလ (၁၃) ရက်နေ့တွင်လည်း မူလဈေးအတိုင်းဖြင့်လယ်မြေများအား ပေးချေသွားမည်ဖြစ်ပြီး
အပ်ရန် ကျန်မြေမှာ (၂၇၀၀) ဧကခန့် ကျန်နေသေးသည်။

“ဒေသခံတွေအနေနဲ့ကတော့ အများစုကအပ်ကြမှာပါ။ ဒါပေမဲ့ အခုကလယ်မြေတွေက တချို့မြေတွေက ပွဲစားတွေ လက်ထဲမှာ ရှိနေပါသေးတယ်။ သူတို့ကတော့ ဘာလုပ်မယ် မသိသေးဘူး။ ဒေသခံ တောင်သူတွေကတော့ ဒီစီမံကိန်းကြီး ဖြစ်မြောက်စေချင်နေတဲ့အတွက် အပ်ကြမှာပါ” ဟုဒေသခံ လယ်ပိုင်ရှင်တစ်ဦးဖြစ်သူ ကိုမြတ်ဆွေက ပြောသည်။

အဆင့်မြင့်မြို့တော်စီမံကိန်းကြီးအား အကောင်အထည်ဖော်မှု ကြန့်ကြာနေသည့်အတွက် ဇွန်လ (၂၅) ရက်နေ့တွင် အဆိုပါမြို့တော်စီမံကိန်းအနီးတွင် အင်အား (၁၅၀) ခန့်ဖြင့် စီတန်းလှည့်လည် ဆန္ဒထုတ်ဖော် ခဲ့ကြသေးသည်။

တံတားဦး အဆင့်မြင့်မြို့တော်စီမံကိန်းကြီးသည် ဧက (၅၀၀၀) အကျယ်ပေါ်တွင် တည်ဆောက်သွားမည်ဖြစ်ပြီး၊ ဟိုတယ်ဇုန်အပြင်အိမ်ရာစီမံကိန်းများ၊ ဈေး၊ ကျောင်း၊
ဆေးရုံနှင့်မြို့တော်တစ်ခုတွင်ရှိသင့်သည့်အရာများအားလုံးပါဝင်သွားမည် ဖြစ်သည်။

Credit; Messenger News Journal